ოპოზიციამ პარასკევს, 15:00 საათზე სამი ლოკაციიდან აქცია-მსვლელობები დააანონსა. ნაციონალური მოძრაობის თავმჯდომარის, ნიკა მელიას განცხადებით, თითოეული ადგილიდან მსვლელობას ერთი ან ორი პარტია გამართავს. კერძოდ, მეტრო ავლაბართან ნაციონალური მოძრაობის მხარდამჭერები შეიკრიბებიან, სადგურის მოედანთან — ლელოს, ხოლო მეტროსადგურ სახელმწიფო უნივერსიტეტთან, ვაჟა-ფშაველას გამზირის ბოლოში გირჩი — მეტი თავისუფლებისა და დროას.

"მივიღეთ გადაწყვეტილება, ერთობლივად, ამ შემთხვევაში უკვე პარტია ლელომ, ნაციონალურმა მოძრაობამ, გირჩიმეტი თავისუფლება და პარტია დროამ, რომ გაიმართოს პარასკევს, სამ საათზე თბილისში სამ განსხვავებულ გეოგრაფიული ლოკაციიდან მსვლელობა, მანიფესტაცია, დემოსტრაცია, რაც გინდა ის დაარქვით", — განაცხადა მელია.

გირჩი — მეტი თავისუფლების ლიდერის, ზურაბ ჯაფარიძის განცხადებით, მათ პარტიასა და დროას ბრძოლის გზად საბოტაჟის, პარალიზების, რესურსების გამოფიტვის, გადაღლისა და ხელის შეშლის რეჟიმი აქვთ არჩეული.

"ჩვენ ბრძოლის გზად, ისევე როგორც დროას არჩეული გვაქვს ხელის შეშლა, საბოტაჟი, პარალიზება, რესურსები გამოფიტვა, გადაღლა და გვგონია, რომ ეს არის სწორი გზა. ამჯერად, კოალიციურ რეჟიმში ვაპირებთ, რომ პარასკევს ერთობლივად გავმართოთ რამდენიმე წერტილში დემონსტრაცია. ჩვენი აზრით, ეს არის ერთ-ერთი საუკეთესო გზა იმისათვის, რომ ერთი მხრივ, ამ ქვეყნის მოქალაქეებს დავანახოთ, რომ შეუძლებელია შეგუება, რა სისტემასთანაც ჩვენ გვაიძულებენ, რომ ვიცხოვროთ და მეორე მხრივ, ქვეყნის გარეთ, ჩვენს მეგობრებს დასავლეთში დავანახოთ, რომ აქ არ არის ნორმალური ვითარება", — თქვა ჯაფარიძემ.

8 ნოემბერს სააკაშვილის მხარდასაჭერ აქციაზე ნიკა მელიამ უწყვეტი პროტესტი დააანონსა. მელიას თქმით, ყოველი დღის ბოლოს მომდევნო დღის გეგმების შესახებ გახდება ცნობილი და საზოგადოებას საპროტესტო აქციების ლოკაციებს შეატყობინებენ.