ერთი უცნაური ფაქტის შემდეგ 6 წელი გავიდა, მაგრამ ჯამალ ჰილტონისა და ვანდა დენჩის მეგობრობა კვლავ მტკიცეა.

მეგობრები ერთმანეთს 2016 წელს შეხვდნენ, როცა ვანდამ ჯამალს შეცდომით ის შეტყობინება გაუგზავნა, რომელიც თავისი 24 წლის შვილიშვილისთვის იყო განკუთვნილი და რომლითაც მას მადლიერების დღესასწაულზე იწვევდა. იმის გამო, რომ ვანდას შვილიშვილს ტელეფონის ნომერი შეცვლილი ჰქონდა, შეტყობინება ჯამალს მიუვიდა, რომელიც მაშინ 17 წლის იყო.

ფოტო: Twitter

თავდაპირველი დაბნეულობა იმით დასრულდა, რომ ვანდამ და ჯამალმა სელფები გაცვალეს და შეცდომის არსშიც მარტივად გაერკვნენ. თუმცა ამის შემდეგ ჯამალმა იკითხა, ისევ შეეძლო თუ არა სადილად მისვლა. "რა თქმა უნდა, შეგიძლია. ბებიები სწორედაც რომ ყველას გემრიელ ვახშამზე ზრუნავენ", — ასეთი იყო ვანდას პასუხი.

ამ დღის შემდეგ 6 წელი გავიდა და მათ მადლიერების დღესასწაულის ერთად აღნიშვნა ტრადიციად ექცათ: გასულ წელს ჯამალმა ვანდას ოჯახს თავისი შეყვარებულიც კი გააცნო.

საერთო შეკრებისას ტრადიციულად ყოველ წელს ფოტოსაც იღებენ.

ფოტო: Jamal Hinton

"ამ ქალბატონის გაცნობა იმის შეხსენება იყო, რომ სამყაროში კარგი ადამიანები ისევ დარჩნენ. ის ძალიან მზრუნველი ადამიანია და ადრე მითხრა, რომ მისი ვეტერანი ქმრის მეგობრებს სადილზე ხშირად იწვევდა და ბევრი ხალხის გვერდით ყოფნას მიჩვეულია. სტუმრობისას კი ისეთი შეგრძნება მაქვს, რომ თითქოს სახლში ვარ", — ამბობს ჯამალი თავისი უფროსი მეგობრის შესახებ People-თან ინტერვიუში.

"როცა ამ ახალგაზრდას პირველად შევხვდი და ვესაუბრე, მაშინვე გავიფიქრე, რომ მისი უკეთ გაცნობა მინდოდა", — ამბობს ვანდა.

2020 წლის აპრილში ვანდასა და მის ქმარ ლონის COVID-19 დაუდასტურდათ. მოგვიანებით კი, ლონი გართულებების გამო გარდაიცვალა. ჯამალი ამ ამბავს სოციალურ ქსელებში გამოეხმაურა და ოჯახთან ერთად გადაღებული ბოლო ფოტოც გააზიარა.

მიუხედავად ქმრის გარდაცვალებისა, მადლიერების დღის შეკრების ტრადიცია არც წელს დარღვეულა. ჯამალმა და ვანდამ წესისამებრ სურათი გადაიღეს და კადრში ლონის ფოტოც მოახვედრეს.

"ოჯახი მხოლოდ სისხლით ნათესაობას არ ნიშნავს, ოჯახი ის ხალხია, ვისთან ერთადაც ყოფნა გინდა", — ამბობს ვანდა.