რუსთავის საკრებულოს ნაციონალური მოძრაობის 6 წევრი ექსპრეზიდენტის სამოქალაქო კლინიკაში გადაყვანის მოთხოვნით შიმშილობას იწყებს. მათი განცხადებით, პროტესტის ამ ფორმას გააგრძელებენ იქამდე, სანამ მათი მოთხოვნა არ შესრულდება.

"46-ე დღეა რაც შიმშილობს ჩვენი ქვეყნის მესამე პრეზიდენტი. მას არ ეძლევა საშუალება, მიიღოს სრულფასოვანი სამედიცინო მომსახურება, აქედან გამომდინარე, ჩენც მივიღეთ გადაწყვეტილება და ვუერთდებით იმ უკიდურეს ფორმას პროტესტისა, რასაც ჰქვია შიმშილობა", — განაცხადა დეპუტატმა.

მიხეილ სააკშვილის სამოქალაქო კლინიკაში გადაყვანის მოთხოვნით გუშინ, 14 ნოემბერს შიმშლობა დაიწყო ენმ-ის 9 დეპუტატმა. ამავე მიზეზით შიმშილობა გამოაცხადა პარტიის კიდევ ერთმა წევრმა, გიორგი ბარამიძემაც. იმავეს ითხოვს დროას დამფუძნებელი, ელენე ხოშტარია, რომელიც საკანონმდებლო ორგანოში მე-13 დღეა შიმშილობს.

ექსპრეზიდენტი უკვე 46 დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში გადაიყვანეს, სადაც იძულებით შეიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

13 ნოემბერს მისმა ექიმმა განაცხადა, რომ სააკაშვილი თავს ცუდად გრძნობდა და საწოლიდან ვერ ადგა. 14 ნოემბერს კი მან აღნიშნა, რომ ექსპრეზიდენტი სუსტად არის, მაგრამ სასამართლო პროცესზე დასწრება შეუძლია. სურვილის მიუხედვად, ის პროცესზე ისევ არ დაასწრეს.