ევროპარლამენტარი ანა ფოტიგა აცხადებს, რომ საქართველოში მიმდინარე მოვლენებს ევროპარლამენტში შეაფასებენ და ევროპული დელეგაციის მიერ აქ მიღებული ინფორმაცია ღირებული იქნება.

პარლამენტის თავმჯდომარესთან, კახა კუჭავასთან შეხვედრის შემდეგ მან განაცხადა, რომ სურთ ზუსტი ინფორმაცია მიაწოდონ პარტნიორებს და მისი საქმე არ არის, რომელიმე მხარის მხარდაჭერა.

"მე უარი მეთქვა იუსტიციის სამინისტროს მხრიდან, რაც ნამდვილად გულდასაწყვეტია, იმიტომ რომ ჩემ თავს გამოცდილ პიროვნებად ვთვლიდი და ძალიან კარგად ვიცი, რომ მაღალი რანგის პატიმრის შემთხვევაში, არსებობს მრავალი ხმა — ანუ პატიმრების ახლობლები ძალიან ემოციურები არიან სიტუაციის შეფასებაში; მეორე მხარეს, რომელიც პასუხისმგებელია პატიმრობაზე, მასაც გააჩნია ინტერესი იმაში, რომ ცალმხრივი ინფორმაცია მიაწოდოს საზოგადოებას.

ევროპის პარლამენტში, სადაც მე ვმუშაობ, ჩვენ შევაფასებთ აღნიშნულ სიტუაციას და ნამდვილად, ჩემს ინფორმაციას, ასევე ლიეტუველი პარლამენტარების ინფორმაციას, რომლებსაც ასევე უარი უთხრეს, ექნება განსაკუთრებული ღირებულება", — განაცხადა მან. [მთავარი არხის თარგმანი]

მანვე განაცხადა, რომ მიიღო იუსტიციის მინისტრის წერილი, სადაც რამდენიმე არგუმენტი იყო მოყვანილი. ფოტიგა ამბობს, რომ წერილს დეტალურად გაეცნობა და პასუხს შემდეგ გასცემს.

ფოტიგამ ისაუბრა მიხეილ სააკაშვილის მმართველობაზეც და განაცხადა, რომ იდეალური არავინაა, მაგრამ ექსპრეზიდენტმა საქართველო გაცილებით უფრო მაღალ დონეზე დააყენა საერთაშორისო სცენაზე.

"მე მიმაჩნია, რომ სააკაშვილის პრეზიდენტობა იყო საკმაოდ მძიმე, იმიტომ, რომ საქართველოში მიდიოდა გარდამავალი პროცესი. მე მახსოვს, რომ ჩემი პირველი განცხადება, რომელიც პირველად გავაკეთე ევროპის პარლამენტში, იყო საქართველოზე, იმიტომ, რომ შემძრა საქართველოს ხალხის ნებამ იმ დროს, როდესაც სააკაშვილი მოვიდა ხელისუფლებაში. ეს იყო მოსახლეობის სურვილი, შეეცვალათ ქვეყანა.

დარწმუნებული ვარ რომ არავინ არ არის იდეალური, რომ მისი პრეზიდენტობა, ბევრმა ცვლილებამ საქართველო გაცილებით უფრო მაღალ დონეზე დააყენა საერთაშორისო სცენაზე, როგორც საინვესტიციო თვალსაზრისით, ისე საერთაშორისო მოთამაშეების ჩართულობის თვალსაზრისით", — განაცხადა მან.

კითხვაზე, რას ეტყოდა მიხეილ სააკაშვილს პირისპირ რომ შეხვედროდა, ფოტიგამ განაცხადა, რომ რთული კითხვაა და თქვა: "ბატონო მიხეილ, გაძლიერდით. ჩვენ თქვენს გვერდით ვართ".

12 ნოემბერს საქართველოში ევროპარლამენტარი ანა ფოტიგა და ლიეტუველი პარლამენტარები ჩამოვიდნენ, მათი მიზანი ექსპრეზიდენტ მიხეილ სააკაშვილის ციხეში მონახულება იყო. ფოტიგა მოშიმშილე ელენე ხოშტარიას შეხვდა, თუმცა ორი დღის განმავლობაში ვერ შეძლო შესვლა საპატიმროში.

იუსტიციის მინისტრი რატი ბრეგაძე აცხადებს, რომ ისინი ექსპრეზიდენტის სანახავად არ შეუშვეს, რადგან სააკაშვილთან დაიშვებიან მხოლოდ საქართველოს პატიმრობის კოდექსით გათვალისწინებული ვიზიტორები. მისი განმარტებით, ამის მიზეზი სააკაშვილის ჯანმრთელობისა და უსაფრთხოების უზრუნველყოფასთან დაკავშირებით პენიტენციური სამსახურის ვალდებულების გათვალისწინებაა.

ოპოზიციური პარტიები აკრიტიკებენ ხელისუფლებას ევროპარლამენტარის საპატიმროში არშეშვების გამო. მათი განცხადებით, მთავრობამ საბოლოოდ ზურგი შეაქცია ევროპას.

მმართველ გუნდს არაერთხელ გაუკრიტიკებია ანა ფოტიგა იმ კრიტიკული ტონის გამო, რასაც ევროპარლამენტარი მათდამი იჩენს. პრემიერმინისტრმა კი საარჩევნო კამპანიის დროს განაცხადა, რომ არც ფოტიგა, არც კუბილიუსი მისთვის და ქვეყნისთვის არაფერს არ წარმოადგენენ.