ლიეტუვის პარლამენტის წევრები ექსპრეზიდენტ მიხეილ სააკაშვილის მოსანახულებლად ჩამოვიდნენ. დეპუტატების თქმით, მათ სააკაშვილის ციხეში მოსანახულებლად განაცხადი უკვე შეიტანეს და ამ დრომდე პასუხს ელოდებიან.

"ჩვენი ვიზიტი პოლიტიკურია, მაგრამ ამ ვიზიტის მიზანი — ჰუმანტარული. გვსურს გავიგოთ, როგორ არის მიშა, ისე, რომ არ ჩავერიოთ საქართველოს შიდა საქმეებში. უბრალოდ რეალურ სიტუაციას ვეცნობით და ასე ვცდილობთ რომ სააკაშვილის შევხვდეთ. შეტანილი გვაქვს განაცხადი და ამ დრომდე ველოდებით პასუხს. ვიცით, რომ საქართველოს სახალხო დამცველის ოფისი ყურადღებით აკვირდება ამ სიტუაციას. ჩვენთვის, როგორც ლიეტუველი პარლამენტარებისთვის საკმაოდ უცნაურია, რომ პრეზიდენტს ასე ექცევიან", — განაცხადა ერთ-ერთმა პარლამენტარმა მთავარი არხის თარგმანის მიხედვით.

"საქართველო არის სუვერენული ქვეყანა და იმედი მაქვს ადამიანის უფლებები დაცული იქნება. ჩვენ გვაქვს ინფორმაცია, რომ მიხეილ სააკაშვილი ახლაც ცუდად არის და ამის გამო შეშფოთებულები ვართ. ძალიან რთულია გარკვევა, ვინ არის პასუხისმგებელი. ვფიქრობ, ახლა ძალიან მნიშვნელოვანია, რომ ის გამოჯანმრთელდეს და ვფიქრობ, უნდა მოხდეს მისი უკრაინაში დეპორტაცია. იმედი მაქვს, რომ ეს მოხდება, რადგან საქართველოში ადამიანის უფლებები და დემოკრატიული ღირებულებები დაცული უნდა იყოს", — ამბობს

პარლამენტის წევრის, სალომე სამადაშვილის განცხადებით, ევროპელი პოლიტიკოსები ელოდებიან იუსტიციის სამინისტროს ნებართვას, რომ სააკაშვილთან შევიდნენ.

"მე პირადად მიმაჩნია, რომ ეს არის ხელისუფლების მცდელობა, იზოლაციაში ამყოფოს საქართველოს მესამე პრეზიდენტი, რომლისთვისაც ევროპელ პოლიტიკოსებთან პირადად შეხვედრა საპატიმროში მნიშვნელოვანი იქნებოდა", — განაცხადა სამადაშვილმა.

მისივე თქმით, თავად დეპუტატის უფლებით ისარგებლებს და სააკაშვილთან შევა, რომ გადასცეს ამ და სხვა ევროპელი პოლიტიკოსების წერილი.

"წერილში არის ორი მოწოდება. ერთი არის ხელისუფლების მიმართულებით, რაც შეეხება მიხეილ სააკაშვილის ჯანმრთელობის და უსაფრთხოების უზრუნველსაყოფად ყველა საჭირო ზომის გატარებას და მისთვის სამართლიანი სასამართლოს უფლების უზრუნველყოფას. მეორე არის მოწოდება მესამე პრეზიდენტისადმი, რომ განიხილოს შიმშილობის შეწყვეტის შესაძლებლობა", — განაცხადა მან.

მიხეილ სააკაშვილი ამჟამად გლდანის ციხის საავადმყოფოში იმყოფება. ის მე-18 პენიტენციურ დაწესებულებაში მისი და მისი ადვოკატების ნების საწინააღმდეგოდ 8 ნოემბერს გადაიყვანეს.

გუშინ, 11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. უწყება აქამდე ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

პენიტენციური სამსახური ამ ვიდეოს გამოქვეყნებასაც მაღალი საზოგადოებრივი ინტერესით ხსნის. უწყების განცხადებით, "კადრებში ნათლად ჩანს, როგორ არ ემორჩილება [სააკაშვილი] დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს".

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.

ასევე, გუშინ მიხეილ სააკაშვილის წერილი გავრცელდა, სადაც ის წერს, რომ როგორც კი სათანადო დაწესებულებაში გადაიყვანენ, შიმშილობას შეწყვეტს. ის 42-ე დღეა შიმშილობს.