იუსტიციის მინისტრი, რატი ბრეგაძე გუშინ ამბობდა, რომ სტრასბურგის სასამართლომ მიხეილ სააკაშვილს შიმშილობის შეწყვეტა "მოთხოვა". დღეს მან ტერმინოლოგია შეცვალა და აცხადებს, რომ სასამართლო ექსპრეზიდენტს "დაჟინებით მოუწოდებს" შიმშილობა შეწყვიტოს.

"საქართველოს მთავრობას სტრასბურგის სასამართლოს წერილით ეცნობა, რომ მიხეილ სააკაშვილის წარმომადგენლებმა მიმართეს ადამიანის უფლებათა ევროპულ სასამართლოს ერთი კონკრეტული მოთხოვნით — დაუყონებლივ მოხდეს მიხეილ სააკაშვილის გადაყვანა მე-18 სამკურნალო დაწესებულებიდან საქალაქო კლინიკაში. სტრასბურგის სასამართლომ მომჩივნის მოთხოვნა არ დააკმაყოფილა და დაჟინებით მოუწოდა მიხეილ სააკაშვილს შიმშილობის შეწყვეტისკენ.

სტრასბურგის სასამართლოს გადაწყვეტილება არის ძალიან მისასალმებელი და ჰუმანური, რომელიც მიზნად ისახავს მსჯავრდებულის ინტერესების დაცვას. სასიხარულოა, რომ ჩვენი სულისკვეთება სრულად ემთხვევა.

უწყებამ არაერთგზის განმარტა, რომ ჩვენი ინტერესია პატიმრის ჯანმრთელობის დაცვა. ამ გადაწყვეტილებით კიდევ ერთხელ დასტურდება საქართველოს პენიტენციურ სისტემაში არსებული მაღალი სტანდარტები.

ყოველივე ზემოაღნიშნულის გათვალისწინებით, ჩვენ მივესალმებით და სრულად ვიზიარებთ გადაწყვეტილების სულისკვეთებას და ცხადია, როგორც გადაწყვეტილებაშია მითითებული 24 ნოემბრისთვის ევროპულ სასამართლოს მივაწვდით ინფორმაციას პატიმრის ჯანმრთელობისა და უსაფრთხოების თაობაზე. და, რა თქმა უნდა, ასევე გავაგრძელებთ მასზე მზრუნველობას", — აცხადებს ბრეგაძე.

10 ნოემბერს ბრეგაძე სტრასბურგის გადაწყვეტილებაზე Facebook-პოსტი დაწერა. იქ ის აღნიშნავდა, რომ სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და "მოსთხოვა შიმშილობის შეწყვეტა".

სააკაშვილის ადვოკატი, ნიკა გვარამია კი ამბობდა, რომ ბრეგაძის ეს განცხადება არ იყო სწორი, რადგან სტრასბურგის სასამართლო ინდივიდს ვერ დაავალდებულებს რაიმეს გაკეთებას.

"ეს არის მოწოდება. ჯერ ერთი ბატონმა რატი ბრეგაძემ უნდა იცოდეს, რომ სასამართლო ინდივიდუალს ვერ დაავალებს რამის გაკეთებას, ერთი და ხელშემკვრელი მხარე არის სახელმწიფო, ორი. თუ არ იცის, სამწუხაროა, რომ იუსტიციის მინისტრია. თუმცა საერთაშორისო ურთიერთობის დეპარტამენტისთვის მაინც უნდა ეკითხა ერთი ეს. მეორე, ბატონმა რატი ბრეგაძემ ამ გადაწყვეტილებაში "call off his hunger strike" — თუ ინგლისური არ იცის, ვიცი, რომ გერმანიაში მიიღო განათლება, ვუთარგმნი, რომ მოუწოდა შიმშილობის შეწყვეტა, იმ შიმშილობის, რომელზეც რატი ბრეგაძე ამტკიცებს, რომ არ არსებობს", — აღნიშნა გვარამიამ.

სტრასბურგის სასამართლომ საქართველოს ხელისუფლებას შიმშილობის შემდეგ მიხეილ სააკაშვილის შესაბამისი მკურნალობა დაავალა. მათივე გადაწყვეტილებით, სახელმწიფომ, ციხეში და ზოგადად, სააკაშვილის უსაფრთხოება უნდა უზრუნველყოს. მათ მთავრობას სააკაშვილის ჯანმრთელობის ამჟამინდელი მდგომარეობის შესახებ ინფორმაციის მიწოდება სთხოვეს, სააკაშვილს კი შიმშილობის შეწყვეტისკენ მოუწოდეს.