დროას ლიდერი, ელენე ხოშტარია აცხადებს, რომ შიმშილობის მე-8 დღეს რამდენიმე ანალიზში ცვლილებებია და საჭიროა სამედიცინო ჩარევა, ამიტომ ის მიიღებს მედიკამენტებს და გაიკეთებს გადასხმას. თუმცა, ხოშტარია უარს ამბობს საკვები დანამატებისა და კალორიების მიღებაზე.

"როგორც ვთქვი, მივიღებ სამედიცინო ჩარევას მხოლოდ იმ შემთხვევაში, როდესაც სასიცოცხლო პარამეტრებს შეეხება [საფრთხე]. რამდენიმე ანალიზში არის ცვლილება, რამდენიმე მაჩვენებელი, თირკმლის და ნერვოლოგიური, მოითხოვს ამ ჩარევას და მე არ მინდა, რომ ვინმემ ინერვიულოს და დაპანიკდეს, ეს არ არის, რომ მე ახლა ვკვდები და არ გვინდა ზედმეტი მღელვარება.

თუ ახლა სამედიცინო ჩარევას თირკმელზე და ამ ნერვოლოგიურზე არ მივიღებ, შეიძლება რაღაც ძალიან ცუდი მოხდეს. ამიტომ, მე დავთანხმდი ერთ გადასხმას. ერთმა გადასხმამ არ გააუმჯობესა ეს პარამეტრები, ის ისევ კრიტიკულ დაბალ ზღვარზეა. დავთანხმდი მეორე გადასხმას და სანამ ეს საფრთხე არ მოიხსნება, მედიკამენტებს მივიღებ. არ მივიღებ კალორიებს, არ მივიღებ დანამატებს. მე ამას ვაკეთებ არა იმისთვის რომ შევიმსუბუქო მდგომარეობა, არამედ იმისთვის, რომ არ დამძიმდეს მდგომარეობა", — განაცხადა ხოშტარიამ.

ელენე ხოშტარია მე-8 დღეა შიმშილობს და ექსპრეზიდენტ მიხეილ სააკაშვილის სამედიცინო დაწესებულებაში გადაყვანას ითხოვს.

ექიმთან კონსულტაციის შემდეგ ელენე ხოშტარიამ პირველი გადასხმა გუშინ გაიკეთა.