ევროპარლამენტარ ვიოლა ფონ კრამონის განცხადებით, მან ქართული ოცნების წევრებთან შეხვედრაზე მმართველი გუნდის ყველა წევრი გააფრთხილა რომ ახლა ისინი ევროკავშირში გაწევრიანებისგან უფრო მეტად შორს დგანან, ვიდრე ოდესმე. საქართველოს ახალგაზრდა იურისტთა ასოციაციის მიერ ორგანიზებულ ონლაინ პანელურ დისკუსიაზე ევროპარლამენტარმა, ასევე, ხელისუფლების წარმომადგენლების ბოლოდროინდელი რიტორიკის, სიძულვილის ენის გამოყენებასა და ადმინისტრაციული რესურსების ბოროტად გამოყენების უარყოფით შედეგებს გაუსვა ხაზი.

"მე ქართული ოცნების ყველა წევრი გავაფრთხილე, რომ მიუხედავად მათი მისწრაფებისა ევროკავშირის წევრი გახდნენ, ახლა უფრო შორს არიან გაწევრიანების კუთხით, ვიდრე ოდესმე. ევროკავშირთან ასოცირების ხელშეკრულება ეს არის პოლიტიკური ჩარჩო, რომელიც არ არის შესრულებული და ძალიან შორის ვართ ჩვენ როგორც სასამართლო ისე სხვა რეფორმებისგან. თითქმის ყოველდღიურად ისინი ამ ვალდებულებიდან გადიან. ჩვენთვის ეს მიუღებელია, რადგან ჩვენი გადასახადის გადამხდელთა ფული იხარჯება და ფაქტობრივად, ვალდებულებები არ სრულდება, არამხოლოდ დემოკრატიული განვითარების კუთხით, არამედ მოქალაქეებისთვის. ანტიევროპული რიტორიკა ძალიან გამაღიაზენებლი იყო ჩემთვის, რამაც საგონებელში ჩამაგდო", — განაცხადა კრამონმა.

მან, ასევე, საქართველოში მედიის მუშაობაც გააკრიტიკა.

"პრობლემის ერთ-ერთი ნაწილი მედიისთვისაც არის ის, რომ დეტალებზე უფრო ღრმა ჩახედვაა საჭირო, ვინ ასრულებს საპარლამენტო, მანდატით დაკისრებულ ვალდებულებებს, ვინ ამართლებს ამომრჩევლების მოლოდინებს.

"მე ვესაუბრე ინდივიდუალურად დეპუტატებს გახარიას, რესპუბლიკელთა ჯგუფიდან, რომელისც ამ შეთანხმებას ხელს აწერდნენ და მზად იყვნენ კომპრომისისთვის, რათა დეპოლარიზაციის კუთხით ემუშავათ, მაგრამ მედიამ ეს კარგად ვერ დაიჭირა.", — აღნიშნავს ევროპარლამენტარი.

პანელური დისკუსიის თემა იყო 2021 წლის ადგილობრივი თვითმმართველობის არჩევნების გავლენა საქართველო-ევროკავშირის ურთიერთობაზე. ვიოლა ფონ კრამონის გარდა მასში მონაწილეობდნენ: ევროკავშირის ელჩი საქართველოში კარლ ჰარცელი, ევროპარლამენტარები ანა ფოტიგა, მარინა კალიურანდი და სხვები.