სახალხო დამცველის განცხადებით, 2021 წლის 18 იავნარს შემდეგ, მე-18 პენიტენციური დაწესებულებაში მე-12 პენიტენციური დაწესებულებიდან არცერთი პატიმარი ექსპრეზიდენტის, მიხეილ სააკაშვილის გარდა, არ გადაუყვანიათ.

"აღსანიშნავია, რომ სახალხო დამცველის აპარატმა შეამოწმა N18 დაწესებულებაში პატიმართა შეყვანის შესახებ დოკუმენტაცია, რის შედეგადაც დადგინდა, რომ ამ დაწესებულებაში 2021 წლის 18 იანვრის შემდეგ დღემდე N12 პენიტენციური დაწესებულების არც ერთი სხვა პატიმარი, გარდა მიხეილ სააკაშვილისა, არ შეუყვანიათ. 2021 წლის 18 იანვრამდე ინფორმაცია ჯერ-ჯერობით უცნობია ღამის საათებში სპეციალურ არქივზე ხელმისაწვდომობის შეუძლებლობის გამო", — აცხადებს ომბუდსმენი.

მისივე თქმით, სააკაშვილი შიმშილობას აგრძელებს და არ იღებს სათანადო მედიკამენტებს, შიმშილობის პროცედურებისთვის აუცილებელ მინერალებსა და ვიტამინებს, ასევე, უარს აცხადებს სამედიცინო დახმარებაზე.

სახალხო დამცველი კიდევ ერთხელ ხაზს უსვამს, რომ მე-18 სამკურნალო დაწესებულება ვერ აკმაყოფილებს კონსილიუმის მიერ გაცემულ რეკომენდაციებს და აცხადებს, რომ დაწესებულებაში სააკაშვილის მოთავსება ცალსახად არღვევს სახელმწიფოს მიერ ადამიანის ღირსების პატივისცემის ვალდებულებას.

"შესაბამისად, სახალხო დამცველი მოუწოდებს იუსტიციის მინისტრს/პენიტენციურ სამსახურს, რომ საქართველოს მესამე პრეზიდენტი მიხეილ სააკაშვილი დაუყოვნებლივ იქნეს გადაყვანილი ალტერნატიულ სამედიცინო დაწესებულებაში", — ვკითხულობთ ომბუდსმენის განცხადებაში.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში 8 ნოემბერს გადაიყვანეს.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად ექსპრეზიდენტის კლინიკაში გადაყვანის აუცილებლობაზე შეთანხმდა.

გუშინ თავისუფლების მოედანზე სააკაშვილის მხარდასაჭერი აქცია გაიმართა და მსვლელობით კანცელარიასთან გაგრძელდა, სადაც აქციის მონაწილეები მთელი ღამის განმავლობაში იყვნენ შეკრებილები.