აპრილში Hulu-მ პოპულარული სერიალის, How I Met Your Mother-ის მოყვარულებისთვის ახალი პროექტი — How I Met Your Father დააანონსა. ახალ სერიალში ტედ მოსბის ნაცვლად, შვილებს სევდიანი და მხიარული მომენტებით დატვირთული გრძელი ისტორიის მოსმენას სოფის პერსონაჟი აიძულებს.

სოფი მომავალში 2021 წლის მოვლენებს იხსენებს და შვილს ქმართან შეხვედრის ისტორიას უყვება. ახალგაზრდა სოფის როლს ჰილარი დაფი მოირგებს, ამბის მთხრობელის, მომავლის სოფის როლს კი Sex and The City-ის ვარსკვლავი — კიმ კეტრელი.

How I Met Your Father სოფის მისი შვილების მამასთან შეხვედრის ისტორიასთან ერთად, გაცნობის აპლიკაციებსა და რომანტიკულ ურთიერთობებთან დაკავშირებულ თანამედროვე გამოწვევებზეც გაამახვილებს ყურადღებას. ჯერჯერობით უცნობია, რა კავშირი ექნება ახალ სერიალს ძველი სერიალის პერსონაჟებთან თუ ისტორიასთან.

ახალი სერიალის შემქმნელები აიზეკ აფთეიქერი და ელიზაბეთ ბერგერი არიან, სერიალის პროდიუსერები კი How I Met Your Mother-ის შემქმნელები — კარტერ ბეისი და კრეიგ ტომასი.

აღსანიშნავია, რომ Sex and The City-ის ახალი სეზონი, სახელად Just Like That... ეკრანებზე ძალიან მალე — დეკემბერში გამოვა, თუმცა მასში კიმ კეტრელი მონაწილეობას აღარ მიიღებს.