ჯანდაცვის მინისტრის მოადგილის, თამარ გაბუნია თქმით, ჯანმრთელობასთან დაკავშირებული ინფორმაცია თანხმობის გარეშე გავრცელებას არ ექვემდებარება, თუმცა ის აქვე აღნიშნავს, რომ პენიტენიცურ სამსახურს, ალბათ, აქვს განმარტება, რატომ გაასაჯაროვა ექსპრეზიდენტის, მიხეილ სააკაშვილის კადრები.

"ამ შემთხვევაში, ჯანდაცვასთან დაკავშირებით ინფორმაცია ყველამ ვიცით, რომ არის კონფიდენციალური ინფორმაცია და თანხმობის გარეშე გასაჯაროებას არ ექვემდებარება. პენიტენიცურ სამსახურს, ალბათ, აქვს განმარტება იმასთან დაკავშირებით, თუ რის საფუძველზე და როგორ მოხდა", — განაცხადა მან.

სააკაშვილი უკვე 38-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. ექიმები და ომბუდსმენი განმარტავენ, რომ ეს არის საკვები დანამატი და არა საჭმელი, რაც საერთაშორისო პროტოკოლით არის განსაზღვრული და შიმშილობის დარღვევად არ მიიჩნევა. როგორც სააკაშვილის ექიმმა თქვა, კადრების გავრცელების შემდეგ ექსპრეზიდენტმა წამლების მიღებასა და ტესტებზე ისევ უარი თქვა.

ეს ინფორმაცია მანამდე, 5 ნოემბერს იუსტიციის მინისტრმა, რატი ბრეგაძე გაავრცელა, როცა თქვა, რომ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. 6 ნოემბერს ამ თემაზე სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. მიღებული ინფორმაციის საფუძველზე ომბუდსმენი აცხადებდა, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.