რამდენიმე დღის წინ ინტერნეტსივრცე "ქართველი ჰაჩიკოს" ამბავმა მოიცვა. ლანჩხუთის ლიანდაგებზე მიტოვებული აკიტას ჯიშის ძაღლის შესახებ ინფორმაცია სოსო ლომინაშვილმა გაავრცელა, მოგვიანებით კი ცხოველთა უფლებადამცველმა ტასო ლოსაბერიძემაც გამოაქვეყნა ფოტო, რომელზეც გულმოსაკლავი შესახედაობითა და დაბნეული, სევდიანი გამომეტყველებით ცუგა ახალი პატრონის მოლოდინში იყო.

ინფორმაციამ უამრავი ადამიანის ყურადღება მიიქცია, ასობით ინტერნეტმომხმარებელმა კი ის იმედიანად გააზიარა.

როგორც ტასო ამბობს, "ძალიან ბევრი ადამიანი დაინტერესდა" ძაღლის ბედით და "ყველამ რაღაც სცადა".

"მეორე დღესვე დაიწყეს მისი მოძებნა, ლანჩხუთის მერი ალექსანდრე სარიშვილიც ჩაერთო ამბავში, იპოვეს, შეიფარეს და ახლა ეკატერინე ლომიძე წასულია ახლა მის ჩამოსაყვანად, რომელმაც თვითონ დააბინავა თბილისში ეს უსაყვარლესი", — დაწერა ტასომ, — "ეკატერინეს დიდი დამსახურებაა მის ირგვლივ ამხელა ამბავი რომ დატრიალდა და უკარგეს ხალხთან წავა მალე ცუგო".

ეკატერინე კი აღნიშნავს, რომ ლანჩხუთის მერისთვის ძაღლის ადგილსამყოფელის მოძიებაში დახმარების თხოვნისა და მისი მიღების შემდეგ, ცუგას საიმედო მეგობარი, გიორგი ლომსაძე უპოვეს. როცა ეკატერინემ, სოსომ და ანი ავსაჯანიშვილმა ჰაჩი ახალ პატრონს ჩააბარეს, იმავე საღამოს ახალდაბინავებულ ძაღლს კლინიკა ვეტექსიდანაც ესტუმრნენ შესაბამისი ანალიზებისა და მკურნალობის პროცედურების ჩასატარებლად.

ფოტო: Soso Lominashvili

ფოტო: Soso Lominashvili

როცა ქართველი ჰაჩიკო სამშვიდობოს დავიგულეთ, შინაური ცხოველების სილამაზის სალონების ქსელმა Groom-მა მალევე მისი ახალი ფოტოებიც გაგვიზიარა. ცუგო, რომელსაც სხვათა შორის ჰაჩი დაარქვეს, სალონში ისე დამშვენდა, რომ ალბათ ფოტოებში მისი ცნობაც კი გაგიჭირდებათ.

ფოტო: Groom.ge - გრუმინგ სალონი / Facebook

საქართველოში მიუსაფარი ცხოველების საკითხი ისევ პრობლემურად რჩება. მათი დიდი ნაწილი პატრონისგან მიტოვებულია, ზოგიერთს კი კიდევ უფრო არ უმართლებს და ახალი, მზრუნველი პატრონის პოვნა უჭირს.

"გზებზე ასეთი უამრავია და ხანდახან რომ შევიმჩნიოთ, რამდენიმეს მაინც გაუმართლებს", — აღნიშნავს ტასოც.