Warner Bros-მა და Airbnb-მა ქერი ბრედშოუს ბინა, რომელმაც HBO-ს შოუ უკვდავყო, სერიალის გაგრძელების And Just Like That-ის პატივსაცემად გულმოდგინედ აღადგინეს.

კედლების საღებავის ფერი, 2000-იანი წლების უსადენო ტელეფონი, კერის შავი ლეპტოპი და იქვე პატარა ჩანაწერი Wifi-ის პაროლის შესახებ და სხვა დეტალები ოთახში ზედმიწევნით არის გაცოცხლებული. ქერის თაროებზეც კი მარტინის ჭიქებით დაწყებული და Vogue-ს ჟურნალებით დამთავრებული ყველა ნიუანსი გათვალისწინებულია.

ფოტო: Kate Glicksberg

რაც შეეხება ქერის გარდერობს, აქაც ყველაფერი დეტალურად მეორდება Manolo Blahniks-ის ფეხსაცმელების ჩათვლით. ბინაში შოუს საკულტო ნივთებიდან ქერის ოქროს ყელსაბამის, Patricia Field-ის ბალერინის კაბის, რომელიც ქერის სერიალის ტიტრებში აცვია და ელეგანტურ სააღდგომო კვერცხების ნახვაც შეგიძლიათ.

რადგან მოდა იმის ერთ-ერთი მთავარი მიზეზია, რატომაც სერიალი სექსი დიდ ქალაქში უყვართ, ბინის დამთვალიერებლებს შეუძლიათ კაბები შეარჩიონ, რაშიც პერსონალური სტილისტი დაეხმარებათ და ფოტოგრაფი კი სასურველ სამოსში გამოწყობილებს სურათებსაც გადაუღებს.

ფოტო: Kate Glicksberg

შოუს მთავარი ვარსკვლავი სარა ჯესიკა პარკერი ქერისთვის დამახასიათებელი სტილით ვირტუალურად მოგესალმებათ. "ქერი ბრედშოუ ჩემთვის ძვირფასი პერსონაჟია და ახლა მისი სამყაროს მონახულება ფანებსაც შეუძლიათ. მოხარული ვარ, რომ მსურველებს ქერის განცდების გაზიარება ამ დონეზე შეეძლებათ და პირდაპირი მნიშვნელობით მის ფეხსაცმელსაც კი მოირგებენ", — ამბობს პარკერი.

ბრედშოუს ბინის დაჯავშნა 8 ნოემბრიდან იქნება შესაძლებელი და ის ერთი ღამით 23 დოლარი ეღირება. ეს თანხა სიმბოლურია, რადგან სერიალი სექსი დიდ ქალაქში 23 წლის წინ დაიწყო. ბინა ნიუ-იორკში, ჩელსის უბანში, მდებარეობს.

იქამდე კი, ფოტოები დაათვალიერეთ და ვინ იცის, იქნებ გეგმებიც კი დასახოთ...

ფოტო: Kate Glicksberg

ფოტო: Kate Glicksberg

ფოტო: Kate Glicksberg

ფოტო: Kate Glicksberg