საინტერესო სერიალისა თუ ფილმის შესაქმნელად მხოლოდ ჩამთრევი სიუჟეტი საკმარისი როდია: უამრავი ჩვენგანი ეკრანებს ჩვენი საყვარელი პერსონაჟების ხათრით შევცქერით და სხვადასხვა სცენაში მათ გამოჩენას მოუთმენლად ველით.

ფილმებისა და სერიალების სცენარის დაწერა კომპლექსური პროცესია, რომლის დროსაც არაერთი დეტალი, მათ შორის — პერსონაჟთა ბედიც იცვლება. როგორც ჩანს, ჩვენთვის საყვარელი უამრავი გმირი რეჟისორებსა და სცენარის ავტორებს თავდაპირველად სიკვდილისთვის ჰყავდათ განწირული, თუმცა, საბედნიეროდ, მოგვიანებით აზრი შეიცვალეს.

მაშ ასე, გთავაზობთ 10 პერსონაჟს, რომელთაც თავდაპირველ ვერსიაში სიკვდილი ელოდათ, თუმცა შემქმნელებმა გადაიფიქრეს:

1. ჯესი პინკმენი — Breaking Bad

ფოტო: Sony Pictures

საკულტო სერიალის შემქმნელი ვინს გილიგანი აარონ პოლის ცნობილი პერსონაჟის მოკვლას პირველივე სეზონში აპირებდა, თუმცა, საბედნიეროდ, გადაიფიქრა. აშკარაა, რომ ამ გადაწყვეტილებამ ნამდვილად გაამართლა, რადგან ჯესი სერიალის გულშემატკივრების უდიდესი ნაწილის საყვარელი პერსონაჟია.

2. ილევენი — Stranger Things

ფოტო: Netflix

მაშინ, როდესაც ნეტფლიქსის პოპულარული სერიალის, Stranger Things-ის მხოლოდ ერთი სეზონი იგეგმებოდა, შემქმნელებს სეზონის ბოლოს ილევენის მოკვლა უნდოდათ. თუმცა მას შემდეგ, რაც გაიგეს, რომ ახალი სეზონის გამოსვლის შესაძლებლობა არსებობდა, გადაწყვიტეს, რომ მთავარი პერსონაჟის ისტორია უნდა გაგრძელებულიყო.

3. სტივ ჰარინგტონი — Stranger Things

ფოტო: Netflix

სერიალში არც ყველასათვის საყვარელ სტივს ელოდა სახარბიელო ბედი. თავდაპირველი ვერსიის მიხედვით, სტივი პირველივე სეზონში უნდა მომკვდარიყო, თანაც ისე, რომ მაყურებლებისთვის კარგი თვისებების ჩვენებასა და მათ გულის მოგებასაც ვერ ასწრებდა.

4. მერედიტი — The Office

ფოტო: NBC Universal

რაც არ უნდა გასაკვირი იყოს, ერთ-ერთი ყველაზე ცნობილი სიტკომის შემქმნელები მეორეხარისხოვანი, მაგრამ ნამდვილად დასამახსოვრებელი მერედიტის მოკვლას აპირებდნენ. ეს კი მაშინ უნდა მომხდარიყო, როცა ერთ-ერთ ეპიზოდში მაიკლი მერედიტს შემთხვევით მანქანით ეჯახება. რა თქმა უნდა, იდეა მალევე დაიწუნეს და მერედიტს საავადმყოფოში მოხვედრა აკმარეს.

5. კასტიელი — Supernatural

ფოტო: Warner Bros.

თავდაპირველი ვერსიის მიხედვით, ყველასათვის საყვარელი ანგელოზი სერიალის მხოლოდ რამდენიმე ეპიზოდში უნდა გამოჩენილიყო, შემდეგ კი მომკვდარიყო, თუმცა კასტიელის პოპულარულობამ სერიალის შემქმნელებს მისი პერსონაჟის განვითარება გადააწყვეტინა.

6. ჯეკ შეპარდი — Lost

ფოტო: ABC

რაც არ უნდა გასაკვირი იყოს, სერიალის ერთ-ერთი მთავარი პერსონაჟი, ჯეკი პირველივე ეპიზოდში უნდა მომკვდარიყო. საბედნიეროდ, შემქმნელებმა მალევე გადაიფიქრეს.

7. ჯინი — Lost

ფოტო: ABC

თითქოს სერიალში მოულოდნელობები არ გვყოფნიდა, ერთ-ერთმა სცენარის ავტორმა შემქმნელების ხელით სიკვდილს ჯინის პერსონაჟიც გამოსტაცა. ამ გადაწყვეტილებამ ბევრი მნიშვნელოვანი და დასამახსოვრებელი სცენაც გადაარჩინა.

8. რონ უისლი — ჰარი პოტერი

ფოტო: Warner Bros

ცუდ განწყობაზე მყოფ ჯოან როულინგს ჰარი პოტერის ერთ-ერთი ყველაზე მნიშვნელოვანი და საყვარელი გმირის — რონის მოკვლა ჰქონდა გადაწყვიტილი. საბედნიეროდ, რონი, რომლის გარეშეც ჰარის ისტორია წარმოუდგენელი იქნებოდა, მეგობრობის ძალამ იხსნა — როულინგს ძალიან უნდოდა, ტრიოს მეგობრობა ბოლომდე გაგრძელებულიყო.

9. არტურ უისლი — ჰარი პოტერი

ფოტო: Warner Bros

როულინგი მაგლების მოყვარული არტურ უისლის მოკვლასაც აპირებდა, თუმცა საბოლოოდ მარტივი მიზეზის გამო გადაიფიქრა: არტური წიგნებში წარმოდგენილ მშობლებს შორის ერთ-ერთი საუკეთესო იყო და ავტორმა ის ვერ გაიმეტა.

10. ჰან სოლო — Star Wars

ფოტო: Warner Bro

წესით, ყველასათვის საყვარელი ჰან სოლო თავდაპირველ ტრილოგიაში უნდა მომკვდარიყო, რასაც თავად სოლოს როლის შემსრულებელი ჰარისონ ფორდიც მხარს უჭერდა, თუმცა რეჟისორმა ჯორჯ ლუკასმა მასთან გამომშვიდობება ვერ შეძლო — ყოველ შემთხვევაში, თავდაპირველ ტრილოგიაში მაინც.