ჯანდაცვის მინისტრის მოადგილე თამარ გაბუნია აცხადებს, რომ ამ ეტაპზე დამატებითი შეზღუდვების დაწესება არ იგეგმება. მისი თქმით, არსებული რეგულაციების აღსრულებამდე დამატებითი შეზღუდვების დაწესება აზრს მოკლებულია.

"ამ ეტაპზე დამატებითი შეზღუდვების დაწესება, დღევანდელი მდგომარეობით, არ იგეგმება, მაგრამ ის შეზღუდვები და რეგულაციები, რომელიც უკვე დაწესებულია, აუცილებლად უნდა აღსრულდეს, რადგან თუ არ მოხდა იმის აღსრულება, რაც უკვე დაწესებულია, აბსოლუტურად აზრს მოკლებულია დამატებითი შეზღუდვების დაწესება", — ამბობს გაბუნია.

3 ნოემბრის მონაცემებით, საქართველოში კორონავირუსის 6 024 ახალი შემთხვევა დადასტურდა, გამოჯანმრთელდა — 3 818, ხოლო გარდაიცვალა 49 ადამიანი.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 732 965-ს, გამოჯანმრთელებულთა რაოდენობა გაიზარდა 673 640-მდე, ხოლო პანდემიის გავრცელებიდან დღემდე ვირუსს ჯამში 10 185 პირი ემსხვერპლა.