ქართული ოცნების წევრი, შალვა პაპუაშვილი ამბობს, რომ არასამთავრობო ორგანიზაციები "ბოდიშს თუ არ მოუხდიან" ცენტრალური საარჩევნო კომისიის თავმჯდომარეს, გიორგი კალანდარიშვილს, "მადლობა მაინც გადაუხადონ". როგორც პაპუაშვილმა თქვა, ცესკოს თავმჯდომარის არჩევისას არასამთავრობო ორგანიზაციები შეთანხმებულად ეწინააღმდეგებოდნენ ამ ფაქტს.

"საბედნიეროდ, მმართველი პარტია აღმოჩნდა მაშინ მოწოდების სიმაღლეზე და ცესკოს თავმჯდომარეც ავირჩიეთ და მათ შორის ცესკოს წევრებიც. აქედან გამომდინარე, მე მათ აღარ მოვუწოდებ, რომ ბოდიში მოუხადონ გიორგი კალანდარიშვილს, ცესკოს თავმჯდომარეს და იმის გამო, რომ მათ მოახდინეს მისი დისკრედიტაცია, თითქოს საჯარო მოხელეს არაფერი ესაქმებათ ცესკოში, მაგრამ ბოდიშს თუ არ მოუხდიან, იქნებ მადლობა მაინც გადაუხადონ ამ არჩევნებისთვის", — თქვა პაპუაშვილმა.

პაპუაშვილმა ასევე თქვა, რომ ორგანიზაციებს ბოდიში უნდა მოეხადათ თამარ ჟვანიასთვისაც.

16-მა არასამთავრობო ორგანიზაციამ თვითმმართველობის არჩევნების ჩატარების პროცესის შესახებ ერთობლივ განცხადება გამოაქვეყნა, სადაც ნათქვამია, რომ კენჭისყრისა და ხმების დათვლის პროცესში ადგილობრივი და საერთაშორისო სადამკვირვებლო მისიების მიერ გამოვლენილი დარღვევები ამომრჩევლის თავისუფალი ნების გამოვლენაზე ნეგატიურად აისახა.