როგორც ჩანს, კალმარის თამაშმა დანარჩენი სამყაროსგან იზოლირებულ ჩრდილოეთ კორეაშიც კი შეაღწია, რადგან ერთ-ერთ ადგილობრივ ვებგვერდზე ამ პოპულარული შოუს შესახებ სტატია დაიწერა.

Rolling Stones-ის ინფორმაციით, სტატიის უცნობი ავტორი სერიალს სამხრეთ კორეის საზოგადოების "მხეცური" ბუნებისა და კაპიტალიზმის კრიტიკის გამო აქებს.

ვებგვერდზე გამოქვეყნებული რეცენზიის მსგავსი ტექსტის შინაარსი ძირითადად იმას ეხება, თუ რატომ გახდა კალმარის თამაში ასეთი პოპულარული, რაც უდავო ფაქტია: სერიალს სულ რამდენიმე კვირაში 111-მა მილიონმა ადამიანმა უყურა.

"შოუ პოპულარული იმიტომ გახდა, რომ ის სამხრეთ კორეის კაპიტალისტურ საზოგადოებას ზუსტად ასახავს, რომელშიც გადარჩენისთვის სასტიკი კონკურენცია მიმდინარეობს და სუსტებს განსაკუთრებული სიხარბე ახასიათებთ", — ვკითხულობთ უცნობი ავტორის პოსტში.

ის უფრო შორსაც მიდის და წერს, რომ ეს სერიალი "ადამიანებს ეხმარება სამხრეთ კორეის საზოგადოების სამწუხარო რეალობა გააცნობიერონ, რომელშიც ჰუმანურობა თანდათან ნადგურდება. ასეთ სამყაროში ცხოვრება, რომელშიც ადამიანებს მხოლოდ ფულით აფასებენ, ნამდვილი წყევლაა".

კალმარის თამაშის ანტიკაპიტალისტური განწყობები ჩრდილოთ კორეის მიღმაც ბევრმა შენიშნა, მიუხედავად იმისა, რომ თავად ნეტფლიქსის ეს შოუ იქცა ერთ-ერთ ყველაზე მომგებიან პროდუქტად. თუმცა ამ ყველაფრის მოსმენა განსაკუთრებით საინტერესოა ჩრდილოეთ კორეიდან, რომელიც თანასწორობისა და სამართლიანობის ეტალონი სახელმწიფო ნამდვილად ვერ არის: მისი ავტოკრატიული მმართველები მდიდრულად ცხოვრობენ, როცა ქვეყნის დიდი ნაწილი სიღარიბეს ებრძვის და ახლაც შიმშილის წინაშე დგას.

ასევე იხილეთ: