რუსთავის 74-ე საარჩევნო უბანზე ხმაური და დაპირისპირება იყო, რა დროსაც სამართალდამცავებმა ნაციონალური მოძრაობის წევრი გიორგი კაპანაძე დააკავეს. მედიის გავრცელებულ კადრებში ჩანს, რომ ის ავტომობილში ჩასვეს და წაიყვანეს.

რუსთავში შემთხვევის ადგილას იმყოფებოდა ევროპული საქართველოს წევრი აკაკი ბობოხიძეც. მისი თქმით, პოლიციას კაპანაძის დაკავების უფლება და საფუძველი არ ჰქონდა.

"კომისიის თავმჯდომარემ არასამართლიანად გადაწყვიტა, რომ უბანი უნდა დაატოვებინოს პოლიციამ. კანონი იძლევა საშუალებას, რომ უბანი დაატოვებინონ, მაგრამ გიორგი კაპანაძე დააკავონ, წაიყვანონ და საერთოდ ჩამოაშორონ არჩევნებს, ამის არც საფუძველი არსებობს, არც კანონის არანაირი ინტერპრეტაცია იძლევა ამის საფუძველს. ჩვეულებრივი ძალადობაა, ქართული ოცნება ყველაფერს აკეთებს, რომ რამენაირად ხალხის პროტესტი გადაფაროს ამ მანიპულაციებით", — აცხადებს ბობოხიძე.

On.ge დაუკავშირდა შინაგან საქმეთა სამინისტროს და მათ პასუხს მიღებისთანავე შემოგთავაზებთ.