ქართული ოცნების აღმასრულებელი მდივანი, მამუკა მდინარაძე ოპოზიციური არხების ჟურნალისტებს მათი კოორდინატორების ბულინგში ადანაშაულებს. მდინარაძის თქმით, ტელევიზიების წარმომადგენლები კოორდინატორებს უსაფუძვლოდ ეკითხებიან, რატომ უჭირავთ მათ ხელში სიები, რადგან კოორდინატორებს 100 მეტრის დისტანციის დაცვით სიებით სარგებლობის ლეგიტიმური უფლება აქვთ.

"ვხედავთ სერიოზულ პროვოკაციებს და რაც არ უნდა სამწუხარო იყოს, ძირითადად, ეს პროვოკაციები, ბულინგი მიმდინარეობს ჩვენი წარმომადგენლების ნაცმოძრაობის ტელევიზიების ჟურნალისტების მხრიდან. კანონის შესაბამისად, ყველა წარმომადგენელს, რომელი პარტიის წარმომადგენელი არ უნდა იყოს ის, აქვს უფლება, თუ ის იცავს 100 მეტრიან დისტანციას და 100 მეტრიან რადიუსს, გასწიოს აგიტაციაც კი, არათუ ჰქონდეს სიები, რომელიც მოიპოვება ცესკოს საიტზე და ღიაა წყაროებში. ჰქონდეს სიები, მოახდინოს ამომრჩევლის მობილიზება, აწარმოოს სააგიტაციო მუშაობაც კი 100 მეტრიან რადიუსში.

ამის მიუხედავად, იმ მიზნით რომ დაბნეულობა გამოიწვიონ ჩვენს წარმომადგენლებში, ნაცმოძრაობის ტელევიზიის ჟურნალისტები დასდევენ და ცდილობენ ჩვენი წარმომადგენლების ბულინგს და ეკითხებიან მათ, რატომ აქვთ სიები. ხაზგასმით და კატეგორიულდ ვაცხადებ, მათ აქვთ ამ სიების ფლობისა და სარგებლობის უფლება. ამიტომ მოვუწოდებ ყველა ტელევიზიას, თავი დაანებონ ამ ადამიანების ბულინგს, იმიტომ, რომ ამ სიების ფლობით ისინი არაფერს უკანონოს არ აკეთებენ. ყველას, ვისაც სია უჭირავს, ამის ლეგიტიმური უფლება აქვს", - განაცხადა მდინარაძემ.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.

არჩევნების შესახებ ყველა სიახლეს შეგიძლიათ On.ge-ზე გაეცნოთ: