ევროპელი ლიდერები ტვიტერზე საქართველოს მოქალაქეებს ულოცავენ ევროპაში უვიზო მიმოსვლის დაწყებას.

ლიტვის პრეზიდენტმა, დალია გრიბაუსკაიტემ "გილოცავთ" ქართულად დაწერა: "ქართველი ხალხისთვის ევროპისკენ გზა ხსნილია. საქართველო, გილოცავ!"

პრეზიდენტის მსგავსად, საქართველოს უვიზო მიმოსვლა მიულოცეს ლიტველმა დეპუტატებმა და საგარეო საქმეთა სამინისტრომ. ლიტვის საგარეო საქმეთა მინისტრმა მილოცვის ვიდეო ქართულად ჩაწერა, სადაც ის ამბობს: "საქართველო არის ევროპა!"

ლიტველებთან ერთად, საქართველს უვიზო რეჟიმი მიულოცა ესტონეთის საგარეო საქმეთა სამინისტრომ.

მილოცვის ტექსტი გამოაქვეყნა ევროკომისარმა იოჰანეს ჰანმაც: "გულწრფელად ვულოცავ საქართველოსა და მის ყველა მოქალაქეს უვიზო მიმოსვლას, რომელიც ძალაში დღეიდან შევა".

უვიზო მიმოსვლის ძალაში შესვლას გამოეხმაურა ევროპის საბჭოც. აღნიშნული ისტორიული მომენტი ქართულად მიულოცა საქართველოს მოქალაქეებს უკრაინის საელჩომ შვედეთში.

რადიო თავისუფლების ბრიუსელის ბიუროს ჟურნალისტმა, რიკარდ იოზვიაკმა, რომელიც აქტიურად აშუქებდა ვიზალიბერალიზაციის მიღების პროცესს, შემდეგი შინაარსის პოსტი გამოაქვეყნა:

"დიდ ხანს ველოდი, რომ ეს ტვიტი გამომექვეყნებინა: საქართველოს მოქალაქეებს დღეიდან უვიზოდ შეუძლიათ მოგზაურობა ევროპის უმეტეს ქვეყანაში".

იოზვიაკის გარდა, ამ ფაქტს დადებითი შეფასებებით და მილოცვით ეხმაურებიან ტვიტერზე ის ჟურნალისტები და ანალიტიკოსები, რომლებიც უკვე წლებია აკვირდებიან საქართველოს გარშემო მიმდინარე პროცესებს.