ექსპრეზიდენტ მიხეილ სააკაშვილის ადვოკატის, ბექა ბასილაიას განცხადებით, პენიტენციური სამსახური ადვოკატისა და კლიენტის ურთიერთობის კონფიდენციალურობას არ იცავს და სააკაშვილთან მათი შეხვედრები ყველასთვის სმენადი და ხილვადია. ბასილაია ამტკიცებს, რომ რასაც შეხვედრების ოთახში ლაპარაკობენ, მეორე დღეს იმას ღარიბაშვილი ამბობს.

"პენიტენციურმა სამსახურმა უკვე არაერთგზის დაარღვია მიხეილ სააკაშვილის ფუნდამენტური უფლებები როგორც სამედიცინო თვალსაზრისით, ასევე, კომუნიკაციის ფარულობის თვალსაზრისით. მიხეილ სააკაშვილთან რასაც ვლაპარაკობთ ერთ დღეს, მეორე დღეს გამოდის ღარიბაშვილი, მოაღებს პირს და მთელი ქვეყნის გასაგონად ლაპარაკობს იმავეს", — განაცხადა ბექა ბასილაიამ ჟურნალისტებთან.

ბასილაია ირწმუნება, რომ შეხვედრების ოთახში არსებულ რამდენიმე დენცქვიტაში მოსასმენი აპარატურაა დამონტაჟებული, დაახლოებით 10 დღის წინ კი პენიტენციურმა სამსახურმა მათ მიერ შეტანილი და გამოტანილი ტექსტების შემოწმება დაიწყო. ადვოკატის თქმით, ამის გამო მათ უზრუნველყვეს, რომ შემოწმების დროს კამერის თვალთახედვის არეში არ მომხვდარიყო ტექსტის ნაწილი, რის შემდეგაც შეხვედრების ოთახში დამცავი ბადე გააკრეს.

"ახლა რა გააკეთეს მათ?! როგორც იცით, ჩვენ გვაქვს აბსოლუტური რწმუნება იმის, რომ იქ დამონტაჟებულ "შტეფსელებში" არის მოსასმენი აპარატურა. აბა, ახლა იქ IT ოთახი არ არის, ხო? 4 "შტეფსელია" შეხვედრების ოთახში. შესაბამისად, ჩვენ მაქსიმალურად ვცდილობთ, ისე ვიკონტაქტოთ მიხეილ სააკაშვილთან, რომ მათთვის აღქმადი არ იყოს და გასაგები საადვოკატო საიდუმლოების ნაწილი. რიგ შემთხვევებში, ჩვენ ფურცელზე ვწერთ გარკვეულ ტექსტს ისე, რომ კამერების თვალთახედვის არეში არ მოხვდეს და ვახდენთ ამ ტექსტის გადაწოდებას მიხეილ სააკაშვილისთვის", — აცხადებს ბასილაია.

27 ოქტომბერს სააკაშვილის ადვოკატმა, დიმიტრი საძაგლიშვილმა განაცხადა, რომ შეხვედრის ოთახში სივრცე, საიდანაც სააკაშვილს წერილებით ეკონტაქტებოდნენ, ბადით დაფარეს. იმავე დღეს მიხეილ სააკაშვილმა განაცხადა, რომ სანამ შეხვედრათა ოთახს პირვანდელი სახე არ დაუბრუნდება, სააკაშვილი მკურნალობაზე უარს ამბობს.

28 სექტემბერს პენიტენციურმა სამსახურმა შეხვედრების ოთახში მინის ბარიერის აღმართვა ახსნა იმით, რომ ექსპრეზიდენტი, მიხეილ სააკაშვილი და მისი ადვოკატები კოვიდრეგულაციებს არღვევდნენ. კერძოდ, უწყების განმარტებით, წერილებს ისინი ერთამანეთს "მაგიდაზე ასვლის გზით" აწვდიდნენ. ამასთან, სააკაშვილი უარს ამბობდა პირბადის გამოყენებაზე.

ადვოკატმა, ბექა ბასილაიამ აღნიშნულის საპასუხოდ განაცხადა, რომ არავის უთქვამს, PCR ტესტი ყოველ ჯერზე რომ უნდა მიეტანათ. მისივე მტკიცებით, მათ არც ის უთქვამთ, რომ სააკაშვილისთვის წერილის გადაცემა და მის მიერ პირბადის არტარება პრობლემას წარმოადგენდა.