ნაციონალური მოძრაობის თავმჯდომარე ნიკა მელია აცხადებს, რომ მას ექსპრეზიდენტ მიხეილ სააკაშვილის გათავისუფლების კონკრეტული გეგმა აქვს, მაგრამ "შიშველი ემოციები" მის განხორციელებას უშლის ხელს. მელიას გეგმასთან დაკავშირებულ დეტალებზე არ უსაუბრია.

"მე მაქვს კონკრეტული გეგმა, მართლაც, თავმდაბლობის გარეშე ვამბობ. მაქვს კონკრეტული გეგმა, როგორ უნდა გათავისუფლდეს მიხეილ სააკაშვილი პატიმრობიდან. ვხედავ ახლა ადამიანს, რომელსაც აქვს შიშველი ემოცია. ხო, მაგრამ ეს შიშველი ემოცია ამ კონკრეტულ, ერთადერთ გეგმას რომ უშლის ხელს... ძვირფასია დრო და არ შეგვიძლია ისტორიული შეცდომის დაშვება იმიტომ, რომ მთავარი, რაც გვაქვს ჩვენ, სულ, სულ ზემოთ ხომ ვახსენე, არის მორალური უპირატესობა, ბრძოლა, რომელიც მიხეილ სააკაშვილს მოგებული აქვს და ერთმა შეცდომამ შეიძლება ეს მორალური უპრატესობა უბრალოდ დაგვაკარგვინოს", — განაცხადა მელიამ მთავარი არხის ეთერში.

მიხეილ სააკაშვილი, დაკავების დღიდან, 26 დღეა შიმშილობს. ექსპრეზიდენტი პირველ ოქტომბერს დააკავეს.

ერთიანი ნაციონალური მოძრაობა ექსპრეზიდენტ მიხეილ სააკაშვილის ჯანმრთელობის მდგომარეობასთან დაკავშირებით საერთაშორისო და ადგილობრივ ორგამიზაციას დახმარების თხოვნით მიმართავს. ენმ-ის განცხადებით, სააკაშვილის შიმშილობა უკვე იმ ფაზაშია შესული, როცა ნებისმიერ წუთს შესაძლებელია უკიდურესად დამძიმდეს და გადაუდებელი სამედიცინო სერვისის გაწევა გახდეს საჭირო.