მას შემდეგ, რაც ინფორმაცია გავრცელდა, რომ გადასაღებ მოედანზე ალეკ ბოლდუინის ნასროლ ტყვიას ოპერატორი ემსხვერპლა, მთელი კინოსამყარო შეძრულია.

მართალია, თავიდანვე ცნობილი იყო, რომ გასროლა სარეკვიზიტო იარაღიდან მოხდა და ალეკ ბოლდუინი დაკითხვაზე პოლიციაში თავისი ნებით გამოცხადდა, მაგრამ გამოქვეყნებულმა სასამართლო ჩანაწერებმა კიდევ რამდენიმე მნიშვნელოვან კითხვას გასცა პასუხი.

გადასაღებ მოედანზე ალეკ ბოლდუინს ხელში იარაღი რეჟისორის თანაშემწემ მიაწოდა, რომელსაც ეგონა, რომ მისი გამოყენება უსაფრთხო იყო: მან არ იცოდა, რომ სარეკვიზიტო იარაღი ნამდვილი ტყვიებით იყო დატენილი.

როგორც სასამართლო ჩანაწერებშია აღწერილი შემთხვევის დეტალები, სანამ ნიუ-მექსიკოში ფილმის სამსახიობო და შემოქმედებითი გუნდი რეპეტიციისთვის ემზადებოდა, რეჟისორის თანაშემწე დეივ ჰოლსმა სპეციალურ ურიკაში ჩადებული სამი სარეკვიზიტო იარაღიდან ერთ-ერთი ამოიღო, ბოლდუინს მიაწოდა და დაარწმუნა, რომ ის სრულებით უსაფრთხო იყო, რადგან ნამდვილი ტყვიებით დატენილი არ იყო.

თუმცა როცა მსახიობმა იარაღი გაისროლა, ოპერატორ გალინა ხატჩინსს ტყვია მკერდში მოხვდა, ამავდროულად კი მის უკან მდგომი რეჟისორი ჯოელ სოუზა მხარში დაიჭრა.

მიუხედავად პროფესიონალების მხრიდან გადარჩენის მცდელობისა, გალინა ხატჩინსი საავადმყოფოში გადაყვანისას გარდაიცვალა. ჯოულ სოუზა კი შედარებით მსუბუქი დაზიანებით მკურნალობდა და უკვე გაწერეს კიდეც კლინიკიდან.

დაკვითხვის შემდეგ პოლიციის შენობიდან გამოსული ალეკ ბოლდუინი.

ფოტო: Jim Weber/The New Mexican

გამომძიებლებმა შემთხვევის ადგილი უკვე შეისწავლეს და ნივთმტკიცებულებად ამოიღეს ბოლდუინის სისხლით დალაქავებული კოსტიუმი და იარაღი, რომლიდანაც გაისროლა. ალეკ ბოლდუინი არ დაუპატიმრებიათ, ამჟამად გამოძიება მიმდინარეობას და კონკრეტული ბრალეულობების შესახებ მოგვიანებით გახდება ცნობილი.

ფილმის Rust გადასაღებ მოედანზე მომხდარ ამ ტრაგიკულ შემთხვევას თავად მსახიობიც გამოეხმაურა ტვიტერის პირად ანგარიშზე გამოქვეყნებული ტექსტით:

"ვერ ვპოულობ სიტყვებს იმ ტრაგიკული შემთხვევისგან გამოწვეული შოკისა და მწუხარების აღსაწერად, რომელმაც ჩვენი ძვირფასი კოლეგის, ცოლისა და დედის — გალინა ხატჩინსის სიცოცხლე იმსხვერპლა. პოლიციასთან სრულად ვთანამშრომლობ, რათა ეს ტრაგედია გამოიძიონ, ამავდროულად კი მუდმივ კონტაქტზე ვარ მის [გალინას] ქმართან და მის ოჯახს სრულ მხარდაჭერას ვთავაზობ. უზომოდ დამწუხრებული ვარ მისი ქმრის, მათი ვაჟისა და ყველა იმ ადამიანის გამო, ვინც იცნობდა და უყვარდა გალინა", — წერს ალეკ ბოლდუინი.