ჟურნალისტის კითხვის პასუხად, პრემიერმინისტრი ღარიბაშვილი მის შეურაცხყოფას ცდილობს.

"სკოლა დაამთავრეთ თქვენ?" — ასე მიმართა მან მედიის წარმომადგენელს მას შემდეგ, რაც მისი კითხვა არ მოეწონა.

TV პირველის ჟურნალისტმა პრემიერმინისტრს ამავე არხის მიერ გავრცელებული დოკუმენტების შესახებ ჰკითხა, რომლის მიხედვით, 2018 წლის საპრეზიდენტო არჩევნებამდე ქართული ოცნება ხმების მოპოვებისთვის პატიმრებს სასჯელს უმცირებდა, აუქმებდა ჯარიმებს, იყენებდა ძალოვანი უწყებების თანაშრომლებს და ა.შ.

კითხვაზე, იყენებს თუ არა ქართული ოცნება სახელმწიფო უწყებებს არჩევნების გასაყალბებლად, ღარიბაშვილმა გაიცინა და თქვა:

"როგორი კითხვა აქვს თან".

შემდეგ ჟურნალისტის ასაკით დაინტერესდა, რომელმაც უთხრა, რომ 22 წლისაა.

"გასაგებია, რომ თქვენ იყავით ძალიან პატარა და ალბათ არ გახსოვთ [სააკაშვილის პერიოდი], მაგრამ ჩართეთ Youtube, გადაახვიეთ, ჰკითხეთ თქვენს მეზობლებს, ნათესავებს ყველას მოუსმინეთ და შეისწავლეთ რეალური ისტორიები, რეალური ადამიანები. არჩევნების გაყალბებაზე რომ მელაპარაკებით სოფო...".

ამ დროს ჟურნალისტმა სცადა კითხვის გამეორება, რაზეც ღარიბაშვილმა უთხრა:

"ნუ მეკამათები რა, დამამთავრებინე. სკოლა დაამთავრეთ თქვენ? უნივერსიტეტში სწავლობთ? ახლა მე რა მინდა გასწავლოთ — როცა რესპონდენტს უსვამთ კითხვას, დაამთავრებინეთ პასუხი. ახლა მე გეტყვით შემდეგ რაღაცას, თქვენ რომ ისწავლოთ და დაარიგოთ გარშემომყოფებიც — როცა არჩევნების გაყალბებაზე თქვენ ლაპარაკობთ, როგორც პარტიული ტელევიზია, მე მინდა თქვენ შეგახსენოთ, როგორც პარტიული ტელევიზიის წარმომადგენელს და პარტიულ აქტივისტს, თქვენ ხართ აქტივისტი დღეს, ნაცმოძრაობის აქტივისტი ხართ თქვენ დღეს, აი, ახლა და სააკაშვილის პარტიას წარმოადგენთ. სააკაშვილის დროს არჩევნებს აყალბებდნენ, სოფო. პირდაპირ ათასობით ბიულეტენს ყრიდნენ საარჩევნო ყუთებში. თქვენ რომ საუბრობთ გაყალბებაზე, ეს არის დიდი უხერხულობა, დიდი სირცხვილი".

ამის შემდეგ ღარიბაშვილმა თქვა, რომ ცაგერსა და ბაღდათში ქართული ოცნების მერობის კანდიდატებს 45 და 55 ხმა დააკლდათ და ხელისუფლებას რაიმე არაკანონიერის გაკეთების სურვილი რომ ჰქონოდა, მათ ხელშია ყველა რესურსი, მაგრამ "არ კადრულობენ", რადგან "ნამდვილად დემოკრატიული მთავრობაა, რომელიც ნამდვილად დემოკრატიულ არჩევნებს ატარებს".

TV პირველმა შაბათის გადაცემაში გაავრცელა დოკუმენტები, სადაც ჩანს, რომ ამომრჩეველთა მობილიზებაში დახმარებისთვის, ქართული ოცნება პატიმრებს ათავისუფლებს, სასჯელს უმცირებს ან გადაჰყავს სხვა დაწესებულებაში, საიდანაც დარეკვასა და ხმების მოპოვებაში დახმარებას შეძლებს, ასევე, უქარწყლებს ნასამართლეობას. ამავე ფაილებში ჩანს, რომ ადამიანებს ხმების სანაცვლოდ უუქმებენ ჯარიმებს, ასევე, ეხმარებიან, სავარაუდოდ, ყალბი ნარკოლოგიური ცნობის მოპოვებაში.

საუბარია 2018 წლის საპრეზიდენტო არჩევნების წინა პერიოდზე, როცა ქართული ოცნების მხარდაჭერილი კანდიდატი სალომე ზურაბიშვილი იყო. ტელეკომპანიამ გაავრცელა ათობით დოკუმენტი, რომლებსაც აწერია, რომ არის მოხსენებითი ბარათი და მოჰყვება კონკრეტული ადამიანების ხელმოწერები, მათ შორის, დეპუტატების. ისინი პარტიის ხელმძღვანელებს სხვადასხვა თხოვნით მიმართავენ. მაგალითად:

"გიგზავნით, ჩვენი მხარდამჭერების სიას და გთხოვთ, გვიშუამდგომლოთ სათანადო სტრუქტურებთან, მათთვის პირობითი სასჯელის შემსუბუქების მიზნით", — ვკითხულობთ ერთ-ერთ მოხსენებით ბარათში, რომელიც, TV პირველის ინფორმაციით, გურჯაანის მაჟორიტარს, დავით სონღულაშვილს ეკუთვნის.

ამასთან, TV პირველის მიხედვით, მმართველი პარტია რეგიონებში ხმების მოპოვების მიზნით, იყენებს დაშინებასა და შანტაჟს, ათავისუფლებს მასწავლებლებს.

კიდევ ერთი ნაწილია არჩევნებში სამართალდამცავი უწყებების წარმომადგენლების ჩართვა — დოკუმენტების მიხედვით, არჩევნების დღეს კონკრეტულ ადამიანებს სამსახურიდან ათავისუფლებდნენ, რათა ისინი პარტიას დახმარებოდენ.