პრემიერმინისტრი ირაკლი ღარიბაშვილი ექსპრეზიდენტ მიხეილ სააკაშვილის შესახებ დასმული კითხვის საპასუხოდ განაცხადა, რომ ეს საკითხი არ არის საინტერესო. მისი თქმით, სახელმწიფო ზრუნავს ყველა პატიმრის ჯანმრთელობაზე, მათ შორის სააკაშვილზე.

"აღარ მაინტერესებს სააკაშვილის შიმშილობა თუ დიეტა. არ არის საინტერესო. ჩვენ, სახელმწიფო ყველაფერს ვაკეთებთ იმისთვის, რომ ყველა პატიმრის უფლება იყოს დაცული და ყველა პატიმრის ჯანმრთელობა იყოს დაცული. ჩემი დავალებით შეიქმნა ეს ჯგუფიც [ექიმთა კონსილიუმი], იმისთვის, რომ არც ერთი კითხვა არ დარჩეს პასუხგაუცემელი; რომ, რა თქმა უნდა, ყველა პატიმარზე, მათ შორის სააკაშვილზეც, როგორც პატიმარზე იზრუნონ.

შიმშილობის ფაქტები ხშირი არ არის, მაგრამ, ყოფილა ციხეებში და როგორც უდგებიან და როგორც ზრუნავენ სხვა პატიმრებზე, ასევე ზრუნავენ სააკაშვილზე, არავითარი პრივილეგია არ ექნება არცერთ პატიმარს", — განაცხადა ირაკლი ღარიბაშვილმა.

მიხეილ სააკაშვილი 20 დღეა შიმშილობს. გუშინ, 19 ოქტომბერს ჯანდაცვის სამინისტროს ბაზაზე შექმნილმა ექიმთა მულტიფუნქციურმა ჯგუფმა სააკაშვილის ციხეში პირველად მოინახულა და მისი პროფილაქტიკური ჰოსპიტალიზაციის რეკომენდაცია გასცა. იმავე დღეს, სააკაშვილის პირადმა ექიმმა, ნიკოლოზ ყიფშიძემ განაცხადა, რომ ექსპრეზიდენტის ნებართვის შემთხვევაში მას, სავარაუდოდ შაბათს, კლინიკაში გადაიყვანენ.

დღეს, მიხეილ სააკაშვილმა ციხიდან მორიგი წერილი გამოაგზავნა, სადაც წერის, რომ შიმშილობას არ შეწყვეტს, მაგრამ ექიმების მხრიდან მედიკამენტოზურ ჩარევაზე თანახმაა.

გაიგე მეტი: