შუაგულ უდაბნოში ხშირად ვერ შევხვდებით ასობით ერთად მდგომ შიშველს ადამიანს, რომლებსაც ტანი თეთრად აქვთ შეღებილი. თუმცა ასეთი სანახაობის მომსწრე მაინც გახდა ამერიკელი ხელოვანი სპენსერ ტუნიკი გასულ შაბათ-კვირას სამხრეთ ისრაელში, მკვდარი ზღვის მახლობლად, როდესაც თავისი ხელოვნების ბოლო ინსტალაციის გადასაღებად ჩავიდა.

ტუნიკი მკვდარ ზღვასთან ხალხს მანამდეც იღებდა და აქ მესამედ იმ მიზნით დაბრუნდა, რათა ის აღებეჭდა, რასაც "ეკოლოგიურ კატასტროფას" უწოდებს.

"მე აქ იმისთვის ვარ, რომ მკვდარ ზღვაში წყლის შემცირების შესახებ ადამიანებს ინფორმაცია მივაწოდო", — განაცხადა ტუნიკმა CNN-თან ინტერვიუში.

ზღვა, რომელიც დედამიწის ყველაზე დაბალ წერტილში მდებარეობს, წელიწადში დაახლოებით ერთი მეტრით უკან იხევს. ამის მიზეზი კი რეგიონში წყლის შეზღუდული მარაგებისთვის ბრძოლა და ათვისებაა.

ტუნიკმა ეს ტერიტორია 10 წლის წინაც მოინახულა და ზღვაში მოცურავე შიშველი ადამიანები იმავე საკითხზე ცნობიერების ასამაღლებლად გადაიღო.

ფოტო: Getty Images

"გარემოსდაცვითი საკითხის სხეულთან დაკავშირება კარგად გვიჩვენებს, თუ როგორი დაუცველია ადამიანის სხეული ბუნების წინაშე და პირიქით, როგორი დაუცველია ბუნება იმ მოვლენებისგან, რისი გამოწვევაც ამ სხეულებს შეუძლიათ", — ამბობს ტუნიკი.

"კაცობრიობა ბუნებაზე დიდ გავლენას ახდენს. ვფიქრობ, რომ სხეულისა და მკვდარი ზღვის ამგვარი შეხამების დემონსტრირება იმას გვაჩვენებს, თუ როგორი უმწეოა თითოეული ერთმანეთის პირისპირ. საკითხის ასე დაყენება კი ახალ ენერგიას შემატებს როგორც საქმეს, ისე ადამიანთა ცნობიერებას", — დასძინა ხელოვანმა.

ფოტო: Getty Images

სპენსერ ტუნიკის შემოქმედებისთვის შიშველი ფოტოსესია უცხო თემა არ არის. ხელოვანს აქამდეც გადაუღია მასიური შიშველი შეკრება ავსტრალიაში და 2016 წელს დონალდ ტრამპის წინააღმდეგ მოწყობილი პროტესტი ოჰაიოს ქალაქ კლიველენდში.