"იმ ქვეყნის პრინცესას, სადაც ერთი და იმავე სქესის მქონე წყვილების ქორწინება პირველად დაკანონდა, უფლება აქვს, ნებისმიერი სქესის ადამიანზე დაქორწინდეს ისე, ტახტზე უარი არ თქვას", — განაცხადა ნიდერლანდების პრემიერმინისტრმა.

ნიდერლანდების პრინცესას კატარინა-ამალიას, რომელიც ჯერ 17 წლისაა, ამ განცხადებაზე კომენტარი არ გაუკეთებია და არც მისი პირადი ცხოვრების შესახებ არის ბევრი რამ ცნობილი.

სამეფო ოჯახის წევრებთან დაკავშირებით კითხვები მას შემდეგ გაჩნდა, რაც ბოლო პერიოდში აქტიურად დაიწყო მსჯელობა, რომ მათთვის არაჰეტეროსექსუალური ქორწინება ძველი კანონების მიხედვით შეუძლებელია. თუმცა პრემიერმინისტრი აღნიშნავს, რომ 2000 წლის შემდეგ ბევრი რამ შეიცვალა, როცა ეს საკითხი ბოლოს განიხილეს.

"მთავრობა თვლის, რომ სამეფო ოჯახის წევრსაც შეუძლია თავისივე სქესის ადამიანზე დაქორწინდეს. ჩვენ მიზეზს ვერ ვხედავთ მეფეს ან ტახტის მემკვიდრეს ეს უფლება წავართვათ მხოლოდ იმიტომ, რომ დაქორწინება თავისივე სქესის ადამიანზე სურს", — დასძინა პრემიერმინისტრმა მარკ რიუტემ.

ნიდერლანდებში ერთნაირსქესიანთა ქორწინება ლეგალური 2001 წელს გახდა. ერთი საკითხი, რომელიც ამ ეტაპზე გადაუჭრელი რჩება ისაა, თუ როგორ იმოქმედებს გეი ქორწინება სამეფო წყვილის შვილის მემკვიდრეობაზე. თუმცა მთავრობის წარმომადგენლები თვლიან, რომ ამაზე მსჯელობა ჯერ ნაადრევია.

"ეს კონკრეტული შემთხვევის ფაქტებსა და გარემოებებზეა დამოკიდებული და თუ სამეფო ოჯახის კანონებს გადავხედავთ, ის პერიოდულად ყოველთვის იცვლებოდა", — ამბობს რიუტე.

ჩვეულებრივი ქორწინებებისგან განსხვავებით, სამეფო ქორწინება პარლამენტის თანხმობას მოითხოვს. იყო შემთხვევები, როცა სამეფო ოჯახის ზოგიერთმა წევრმა მემკვიდრეობაზე უარი თქვა, რათა ნებართვის გარეშე დაქორწინებულიყვნენ.