პრემიერმინისტრი ირაკლი ღარიბაშვილი განმარტავს, რომ მიხეილ სააკაშვილთან დაკავშირებული მისი მუქარა, რომ თუ ექსპრეზიდენტი წესიერად არ მოიქცევა, სხვა მუხლებიც დაემატება, ადამიანებმა არასწორად გაიგეს და მან უბრალოდ თეორიულად განმარტა ის პროცესი, რაც მსჯავრდებულის მხრიდან ახალი დანაშაულის ჩადენას მოყვებოდა. მისი თქმით, კითხვას "ნახევრად ირონიულად, პოლიტიკურად" უპასუხა.

"მე ვურჩევდი ყველა იმ ადამიანს, ვინც ჩემი განცხადება არასწორად გაიგო, კიდევ ერთხელ მოუსმინონ ჩემს განცხადებას და არასწორი ინტერპრეტაციები არ უნდა გააკეთონ ჩემს განცხადებაზე. ერთი — მე უბრალოდ ჩემს პოლიტიკურ შეფასებას ვაკეთებდი, მეორე — მე არ მითქვამს, რომ თუ წესიერად არ მოიქცეოდა... მე ვიგულისხმე, იმ შემთხვევაში თუ, რა თქმა უნდა... იქ ჟურნალისტი მეკითხებოდა, რომ სააკაშვილი კვლავაც მოუწოდებს რაღაც და გარკვეული, ასე ვთქვათ, მე წავიკითხე დაუმორჩილებლობა და რაღაც გადატრიალების მსგავსი მოწოდება ჰქონდა გაკეთებული პატიმარ სააკაშვილს და მხოლოდ ამაზე საპასუხოდ, ბუნებრივია, ნახევრად ირონიულად, პოლიტიკურად ვუპასუხე, რომ ეს საერთოდ ცხადი არის, ყველამ ასე იცის, ნებისმიერმა ადამიანმა, დამწყებმა იურისტმა კარგად იცის, რომ თუ პატიმარი ახალ დანაშაულს ჩაიდენს, მათ შორის საპატიმროში, მას, ბუნებრივია, კანონი ითვალისწინებს ამას, რომ სხვა მუხლები და სხვა სასჯელი დაემატება. ეს ისე განმარტებისთვის", — აცხადებს ღარიბაშვილი [სტილი დაცულია].

ღარიბაშვილმა თქვა ისიც, რომ ის არ წყვეტს, სააკაშვილს დააკავებდნენ თუ არა და არც ის არის მისი გადასაწყვეტი, "ვის რა მუხლი დაემატება". მისი თქმით, "უბრალოდ განმარტება" გააკეთა.

"რა თქმა უნდა, ამას მე არ ვწყვეტ როგორც პრემიერმინისტრი, სააკაშვილს დააკავებდნენ თუ არ დააკავებდნენ. სააკაშვილი მოგეხსენებათ, რომ არის მსჯავრდებული. იგი იყო ბრალდებული და არის კიდევაც ბრალდებული სხვა საქმეებზე და მათ შორის მსჯავრდებული იყო ორ საქმეზე, რომელიც არის გირგვლიანის საქმე და ასევე, ახლა მიმდინარეობს იმედის საქმე, რომელიც ერთ-ერთი ყველაზე სკანდალური იყო ჩვენს ქვეყანაში და ვალერი გელაშვილის საქმეზე არის გასამართლებული, მსჯავრდებული არის. აქედან გამომდინარე, რა თქმა უნდა, ჩემი გადასაწყვეტი არ არის ვის რა მუხლი დაემატება, უბრალოდ განმარტება გავაკეთე. თუ ნებისმიერი მსჯავრდებული, პატიმარი, მათ შორის სააკაშვილი, თუ დამატებით ახალ დანაშაულს ჩაიდენს, ბუნებრივია, მას ახალი სასჯელი დაემატებოდა, ეს იყო თეორიული საუბარი", — განაცხადა ღარიბაშვილმა.

3 ოქტომბერს პრემიერმინისტრი ციხეში მყოფ ექსპრეზიდენტს დაემუქრა და თქვა, რომ "წესიერად მოიქცეს, თორემ დავუმატებთ კიდევ სხვა მუხლებს და სხვებსაც მივაყოლებთ".