სერბეთის სახელით მოასპარეზე ზურაბ დათუნაშვილი მსოფლიო ჩემპიონი გახდა. ფინალში მან ბელარუს კირილ მასკევიჩს სძლია.

მანამდე მეოთხედფინალში დათუნაშვილმა მოქმედი მსოფლიო ჩემპიონი, საქართველოს სახელით მოასპარეზე ლაშა გობაძე დაამარცხა, რომელმაც ამ ჩემპიონატზე ბრინჯაოს მედალი აიღო.

წელს დათუნაშვილი სერბეთის სახელით ევროპის ჩემპიონი და ოლიმპიადის ბრინჯაოს პრიზიორიც გახდა. სპორტსმენმა სერბეთის სახელით ასპარეზობის გადაწყვეტილება მას შემდეგ მიიღო, რაც ფედერაციის პრეზიდენტი, გეგა გეგეშიძე თავს დაესხა.

2019 წლის 11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. მოჭიდავე ზურაბ დათუნაშვილს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ სახეში ბლაგვი საგანი და მუშტი ჩაარტყა.

გეგეშიძე დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. მოჭიდავეების ნაწილი ფედერაციის პრეზიდენტის დაკავებას აპროტესტებდა. ისინი გეგეშიძის გათავისუფლებას ითხოვდნენ და ამბობდნენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის ოდენობის გირაოს გადახდის შემდეგ დატოვა. გარდა ამისა, მან ჭიდაობის ფედერაციის პრეზიდენტის პოსტიც შეინარჩუნა.

ამ ინციდენტის შემდეგ დათუნაშვილი ამბობდა, რომ არჩევანის წინაშეა დაასრულოს კარიერა ან სხვა ქვეყნის სახელი იასპარეზოს. გარდა ამისა, სპორტსმენი აცხადებდა, რომ ჭიდაობის ფედერაცია კარიერის დასრულებას აიძულებდა, რადგან სხვა ქვეყნის სახელით ჭიდაობის უფლებას არ აძლევდნენ. მაშინ ფედერაცია ბრალდებებს უარყოფდა, ხოლო გეგეშიძე ამბობდა, რომ დათუნაშვილმა ქვეყნიდან წასვლა დიდი ხნით ადრე გადაწყვიტა.