ნორვეგიის საელჩო ღრმა მწუხარებას გამოთქვამს ბათუმში დატრიალებული ტრაგედიის გამო და დაშავებულებს სწრაფ გამოჯანმრთელებას უსურვებს.

"ჩვენი ფიქრები ახლა დაღუპულთა ოჯახებსა და ახლობლებთანაა. დაშავებულებს სწრაფ გამოჯანმრთელებას ვუსურვებთ, და დიდ პატივისცემას გამოვხატავთ სამძებრო-სამაშველო სამსახურის თანამშრომლების მიმართ, გაწეული თავდაუზოგავი სამუშაოებისთვის", — ვკითხულობთ საელჩოს განცხადებაში.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. სამაშველო ღონისძიება თითქმის 30 საათის განმავლობაში მიმდინარეობდა.დაღუპულია 9 ადამიანი, გადარჩა ერთი. გარდაცვლილებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

კორპუსის ჩამონგრევის საქმეზე სამი ადამიანი დააკავეს. ერთ-ერთი ზაურ ბუდატოვია, რომელიც პირველ სართულზე მდებარე ბინის მესაკუთრეა. დანარჩენი ორი კი მის მიერ დაქირავებული მშენებლები. პროკურატურა აცხადებს, რომ ბრალდებულებმა მოშალეს მზიდი და არამზიდი კედლები, რითიც დაირღვა საცხოვრებელი კორპუსის სიმტკიცე და მდგრადობა და ნგრევა გამოიწვია.

ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა. მთავრობის განკარგულებით, ორშაბათს 00:00 საათიდან, 12 ოქტომბრის 00:00 საათამდე, საქართველოს მთელს ტერიტორიაზე სახელმწიფო დროშები დაეშვება.