ქართული ოცნების განცხადებით, ბათუმში მომხდარი ტრაგიკული შემხთხვევის გამო, 12 ოქტომბრამდე საარჩევნო კამპანია წყვეტენ.

"ბათუმში დატრიალებულმა უმძიმესმა ტრაგედიამ მთელი ქვეყანა შეძრა. ღრმა მწუხარებას გამოვთქვამთ და ვუსამძიმრემთ დაღუპულთა ოჯახებს, ახლობლებს და სრულიად საქართველოს. დღეს, თითოეული ქართველი გლოვობს. დაღუპულთა ხსოვნის პატივსაცემად, ქართული ოცნება 12 ოქტომბრამდე ყველა საარჩევნო-პოლიტიკურ აქტივობას წყვეტს. არ შეიძლება ხაზი არ გავუსვათ სამაშველო ოპერაციაში ჩართული თითოეული ადამიანისა და სამსახურის განსაკუთრებულ თავდადებას. უდიდეს მადლობას ვუხდით მაშველებს თავგანწირვისთვის", — ნათქცამია განცხადებაში.

ქალაქში მომხდარი ტრაგედიის გამო საარჩევნო კამპანიას წყვეტს ბათუმში ოპოზიციის მერობის შეთანხმებული კანდიდატი და ნაციონალური მოძრაობის წევრი გიორგი კირთაძეც.

თბილისის მერობის კანდიდატმა, კახა კალაძემ კი განაცხადა, რომ ბათუმის ტრაგიკული შემთხვევის გამო თბილისობა არ ჩატარდება და ამ ღონისძიებისთვის გამოყოფილი თანხა ბათუმში დაღუპულთა ოჯახების ფონდში გადაირიცხება.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, ნანგრევებში ერთ ადამიანს ეძებენ. რამდენიმე საათის წინ ნანგრევებიდან კიდევ ორი ადამიანის — ქალისა და 12 წლამდე მოზარდის ცხედარი იპოვეს.

ამ დროისათვის ნაპოვნია 7 ცხედარი — 3 ბავშვი, 1 ასაკოვანი, 1 შუა ხნის ასაკის ქალი და 2 კაცი. სამაშველო და სამძებრო ღონისძიებები 24 საათზე მეტია გრძელდება.