შინაგან საქმეთა მინისტრის, ვახტანგ გომელაურის თქმით, ბათუმში საცხოვრებელი კორპუსის ნგრევის მიზეზი, შეიძლება, ქვედა სართულზე მიმდინარე სამუშაოები იყოს, რომელსაც მესაკუთრეები აკეთებდნენ. შსს-ს მინისტრი ასევე ამბობს, რომ ჯერ გამოძიება მიმდინარეობს და ზუსტი ინფორმაცია არ აქვთ.

"წინასწარი მონაცემებით, იყო რამდენიმე ვერსია, გაზის ვერსიაც განიხილებოდა, თუმცა, ჩვენი ინფორმაციით, მიდიოდა ქვემოთ სამშენებლო სამუშაოები, მესაკუთრეები აკეთებდნენ ამას და შეიძლება ეს იყოს მიზეზი, წინასწარ ვერ ვიტყვით, გამოძიებიდან დადგინდება. ეს იყო იმ საყრდენი კედლის გამოცლის მიზეზი, ან რაღაც სხვა მიზეზი და გამოძიება მიდის და რა თქმა უნდა, პასუხისგებაში მიეცემიან ეს ადამიანები", — ამბობს გომელაური.

ვახტანგ გომელაურის თქმით, გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

გომელაურმა ასევე თქვა, რომ დაახლოებით, 10-15 ადამიანია ბათუმში, კორპუსის ნანგრევებში მოყოლილი, რომელთაგან 2 კონტაქტზე იმყოფება.

ბათუმში, 26 მაისის ქუჩაზე საცხოვრებელი კორპუსი ჩამოინგრა. მსხვერპლის შესახებ ინფორმაცია, ჯერჯერობით, არ ვრცელდება. ამ ეტაპზე უცნობია ნგრევის მიზეზი.

ჯერჯერობით, დადასტურებულად არის ცნობილი, რომ ნანგრევებიდან მცირეწლოვანი ბავშვი გამოიყვანეს, რომელსაც სამედიცინო დახმარება აღმოუჩინეს და უკვე სახლში გაწერეს.