თავდაცვის სამინისტროს ინფორმაციით, დღეს ნაციონალური მოძრაობის მიერ გავრცელებულ ფოტოებზე ასახულია არა რუსული სამხედრო ტექნიკის, არამედ სამოქალაქო დანიშნულების ტექნიკის გადაადგილება. ინფორმაცია ამის შესახებ თავდაცვის სამინისტროს ვებგვერდზე გამოქვეყნდა.

"თავდაცვის სამინისტრო გასცემს ნებართვებს სამხედრო პროდუქციის ტრანზიტზე, თუმცა ამ შემთხვევაში, მსგავსი ნებართვა არ გაცემულა. მოგახსენებთ, რომ სამხედრო პროდუქციის ტრანზიტზე წლებია, არც სომხეთიდან და არც რუსეთიდან თავდაცვის სამინისტროსთვის არ მოუმართავთ და შესაბამისად, არც ნებართვა გაცემულა," - განმარტავენ უწყებაში.

ნაციონალური მოძრაობის წარმომადგენელმა, ნუგზარ წიკლაურმა ინფორმაცია გაავრცელა, რომლის მიხედვითაც, დღეს, ბოლნისის რაიონში, რუსული სანომრე ნიშნით ავტომობილები გადაადგილდებოდა. წიკლაური ვარაუდობდა, რომ ავტომობილებს სამხედრო ტექნიკა გადაჰქონდათ.