ნობელის პრემია ლიტერატურის დარგში აბდულრაზაკ გურნას გადაეცა

სულ რამდენიმე წუთის წინ ლიტერატურის დარგში ნობელის პრემიის 2021 წლის ლაურეატი დასახელდა: ტანზანიელი მწერალი აბდულრაზაკ გურნა.

როგორც ნობელის კომიტეტმა განმარტა, აბდულრაზაკ გურნაზე არჩევანი იმ "უკომპრომისო და თანაგრძნობით განმსჭვალული" თხრობისთვის გააკეთეს, რომლითაც მწერალი "კოლონიალიზმის შედეგებსა და კონტინენტებსა და კულტურებს შორის წარმოქმნილ უფსკრულში აღმოჩენილი ლტოლვილების ბედს" აღწერს.

The New York Times-ის ინფორმაციით, ის პირველი აფრიკული წარმოშობის მწერალია, რომელსაც ბოლო ორ ათწლეულში ლიტერატურის ეს ყველაზე გავლენიანი ჯილდო გადაეცა. ნობელის ისტორიაში ჯამში სულ ხუთი აფრიკელი ავტორი გახდა ამ პრემიის ლაურეატი.

აბდულრაზაკ გურნა აღმოსავლეთ აფრიკაში, ტანზანიის რესპუბლიკის კუნძულ ზანზიბარზე დაიბადა 1948 წელს, 60-იანებში კი ემიგრაციაში მოუწია წასვლა და დღემდე ინგლისში ცხოვრობს.

გურნას ათამდე რომანი აქვს დაწერილი, რომელთა ძირითადი თემა ლტოლვილების გამოცდილებაა.

შეგახსენებთ, რომ გასულ წელს ლიტერატურის დარგში ნობელის პრემია ამერიკელ პოეტ ლუიზ გლუკს გადაეცა და ის რიგით მე-16 ქალი გახდა, ვისაც ეს ჯილდო მიუღია. 2019-ში კი იმავე და წინა წლის — 2018-ის ნობელიანტი ავტორები ერთად დასახელდნენ: პოლონელი მწერალი ოლგა ტოკარჩუკი და ავსტრიელი პეტერ ჰანდკე.

ნობელის პრემია მსოფლიოში ერთ-ერთი ყველაზე გავლენიანი საერთაშორისო ჯილდოა, რომლის დაარსებაც შვედი ქიმიკოსის ალფრედ ნობელის სახელს უკავშირდება. პრემია 1901 წლიდან გაიცემა ქიმიის, ფიზიკის, ლიტერატურის, მშვიდობისა და ფიზიოლოგია/მედიცინის დარგში. პრემიის მფლობელებს 9 მილიონი შვედური კრონა გადაეცემათ, რაც დაახლოებით ერთ მილიონ დოლარს უდრის.

ლიტერატურის დარგში ნობელის პრემია წარსულში მიღებული აქვთ ისეთ ცნობილ ავტორებს, როგორებიც არიან ჰაინრიხ ბიოლი (1972), ჟოზე სარამაგუ (1998), მარიო ვარგას ლიოსა (2010) და სვეტლანა ალექსიევიჩი (2015).