ჯანდაცვის მინისტრის მოადგილის, თამარ გაბუნიას განცხადებით, ამ ეტაპზე 12-დან 15 წლამდე ბავშვებში ვაქცინაციის რეკომენდაციას კვლავ ქრონიკული დაავადებების მქონე ბავშვებში გასცემენ. ამის შესახებ მან იმუნიზაციის საბჭოს სხდომის დასრულების შემდეგ ისაუბრა.

"მიუხედავად იმისა, რომ ევროპის ბევრმა ქვეყანამ დაიწყო ფართო ვაქცინაცია ამ ასაკობრივ ჯგუფში, ჩვენ პირველ ეტაპზე შევჩერდით 12-დან 15 წლამდე მხოლოდ ქრონიკული დაავადების მქონე ბავშვებზე და ასევე, აქაც იკვეთება ჯგუფები, რომელთაც სჭირდებათ ხშირი მოგზაურობა ან სხვა ქვეყანაში უკვე ჩაიტარეს და მეორე დოზა აქვთ ჩასატარებელი საქართველოში დაბრუნების შემდეგ, რა თქმა უნდა მათი მოთხოვნებიც ინდივიდუალურ საფუძველზე იქნება გათვალისწინებული და დაკმაყოფილდება", — განაცხადა მან.

საქართველოში ჯანდაცვის სფეროს წარმომადგენლებს არაერთხელ უსაუბრიათ 12 წელს ზემოთ მოზარდების ვაქცინაციაზე. დაავადებათა კონტროლის ეროვნული ცენტრის დირექტორი, ამირამ გამყრელიძე აღნიშნავს, რომ თუ ბავშვებსა და მოზარდებში ვაქცინაცია არ ჩატარდა, პანდემიას საბოლოო წერტილი ვერ დაესმება.