ცენტრალური საარჩევნო კომისიის თავმჯდომარის, გიორგი კალანდარიშვილის მტკიცებით, ცესკოს მიერ პირველადი წინასწარი შედეგების გამოქვეყნება დაგვიანებული არ იყო. მისივე თქმით, შედეგების გამოქვეყნების კონკრეტული დროის შესახებ ჩანაწერი არ არსებობს.

"ვერ ვიტყვი, რომ ეს იყო დაგვიანება, იქიდან გამომდინარე, რომ არსად მსგავსი ჩანაწერი იმის შესახებ თუ რა კონკრეტულ დროს უნდა მოახდინოს საარჩევნო კომისიამ წინასწარი შედეგების გამოქვეყნება, არ არის მითითებული და განსაკუთრებით იმ ფონზე, როდესაც პირველივე შემაჯამებელი ოქმის შემოსვლისთანავე, ყველა შესაბამისი ოქმის განთავსება ხდებოდა ცესკოს ვებგვერდზე და ეს ხდებოდა ავტომატურად", — ამბობს კალანდარიშვილი რუსთავი 2-ის ეთერში.

აღსანიშნავია, რომ თვითმმართველობის არჩევნების შემდეგ ცენტრალურმა საარჩევნო კომისიამ პირველადი შედეგები კენჭისყრის დასრულებიდან 11 საათის შემდეგ გამოაქვეყნა. თავმჯდომარე, გიორგი კალანდარიშვილის აცხადებდა, რომ ამის მიზეზი იყო ის, რომ სურდათ, წინასწარ მონაცემებს აესახა "მაქსიმალურად პროპორციული ხმათა რაოდენობა, რისი შესაძლებლობაც ამ დრომდე ბოლომდე არ იყო".

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.