დეპუტატმა სალომე სამადაშვილმა პრემიერმინისტრ ირაკლი ღარიბაშვილის მიერ ბიძინაობის მილოცვა კერპთაყვანისმცემლობას შეადარა. მისი თქმით, ეს განსაკუთრებით უკვირს იმ პრემიერმინისტრისგან, რომელიც "მუდმივად გვესაუბრება იმაზე, თუ რაოდენ თავგამოდებული მართლმადიდებელი ქრისტიანია".

"მე მინდა გამივეხმაურო სამარცხვინო განცხადება თქვენი პრემიერმინისტრის, რომელმაც ყოფილი პრეზიდენტის დაპატიმრება მიუძღვნა ჩვენს ქვეყანაში. ეს განსაკუთრებით მიკვირს იმ პრემიერისგან, რომელიც მუდმივად გვესაუბრება იმაზე, თუ რაოდენ თავგამოდებული მართლმადიდებელი ქრისტიანია.

შეგახსენებთ ბატონებო, ვისაც კერპად გაგიხდიათ ბიძინა ივანიშვილი ათი მცნებიდან მეორეს, კერპთაყვანისმცემლობას რაც შეეხება. სამარცხვინო ხალხი ხართ მთლიანად ყველა, მთელი შემადგენლობა, ვინც ამ სამარცხვინო კერპთაყვანისმცემლობაში მონაწილეობთ, რომელსაც არაფერი არ აქვს საერთო არც თანამედროვე სახელმწიფოსთან, არც დემოკრატიასთან, არც სამართალთან და არც მართლმსაჯულებასთან", — განაცხადა სალომე სამადაშვილმა.

საგანგებო ბრიფინგზე, სადაც პრემიერმინისტრმა საზოგადოებას აცნობა, რომ ექსპრეზიდენტი მიხეილ სააკაშვილი დააკავეს, ირაკლი ღარიბაშვილმა ისიც თქვა, რომ დღეს არის ბიძინაობაა. მეტიც, პრემიერმინისტრმა ქართული ოცნების დამფუძნებელს ეს დღე და არჩევნებში გამარჯვებიდან 9 წლისთავი მიულოცა.