საავტომობილო გზებს დეპარტამენტის ინფორმაციით, რიკოთის მაგისტრალზე, გზის სავალი ნაწილის გასწვრივ ფერდის ჩამოშლის გამო მოძრაობა ნაწილობრივ შეიზღუდა. უწყების ცნობით, ამ დროისთვის მოძრაობა მხოლოდ ერთ ხაზზეა შესაძლებელი.

"საერთაშორისო მნიშვნელობის თბილისი-სენაკი-ლესელიძის საავტომობილო გზის 155-ე კილომეტრთან (რიკოთის მონაკვეთი), გზის მიმდებარე ფერდზე ჩამოიშალა მიწის ნაწილი, რის გამოც ნაწილობრივ ჩაიკეტა საავტომობილო გზის სავალი ნაწილი", — აცხადებენ გზების დეპარტამენტში.

უწყების ცნობით, მიმდინარეობს სამუშაოები საავტომობილო მიმოსვლის უმოკლეს დროში აღსაღდგენად.

სოციალურ ქსელში ვრცელდება ვიდეოები და ფოტოები, სადაც ჩანს, რომ რიკოთის მაგისტრალზე საცობია. ამ სიტუაციის ამსახველი ვიდეო ფეისბუქგვერდზე გააზიარა პარტია გირჩი — მეტი თავისუფლების ლიდერმა, ზურაბ ჯაფარიძემ და დაწერა, რომ "შეუძლებელია ეს იყოს შემთხვევითობა". ჯაფარიძე საცობს მიმდინარე არჩევნებს უკავშირებს და აცხადებს, რომ შეფერხების გამო ხალხი ვერ ახერხებს ხმის მისაცემად რეგიონში ჩასვლას ან თბილისში ჩამოსვლას.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.