ბრიტანელი პოპ ვარსკვლავი რობი უილიამსი ამბობს, რომ მას სურვილი აქვს მუსიკალურ კონკურს "ევროვიზიაზე" რუსეთის სახელით წარსდგეს. ამის შესახებ უილიამსმა რუსული პირველი არხის ეთერში, ერთ-ერთ გადაცემაში ისაუბრა:

"მე მიყვარს "ევროვიზია". იქ ყველაფერი ისეთი ლამაზია, გრანდიოზული შოუა. მე მონაწილეობას მივიღებდი "ევროვიზიაზე" რუსეთის სახელით - ამას ახლა ისე ვამბობ, მაგრამ ჩემმა მენეჯერმა უკვე აიტაცა ეს იდეა. მსურს, რომ რუსეთი წარვადგინო "ევროვიზიაზე". მოდი რუსეთო, ჩვენ შევძლებთ გამარჯვებას".

"ევროვიზია 2017" კიევში, უკრაინაში ტარდება. ფინალი 13 მაისს უნდა გაიმართოს. წლევანდელ "ევროვიზიაზე" რუსეთს წარმოადგენს მომღერალი იულია სამოილოვა, რომელსაც, შესაძლოა, კიევმა ქვეყანაში შესვლის ნება არ მისცეს. უკრაინული მხარის განცხადებით, ის 2015 წელს ოკუპირებულ ყირიმში იმყოფებოდა უკრაინის მთავრობის ნებართვის გარეშე.