ისლამური სახელმწიფოს ქართულ ვებსაიტზე დღეს, 22 თებერვალს გამოქვეყნდა ვიდეო, სადაც ხალიფატის ქართველები საუბრობენ სირიაში დაღუპულ ქართველ თანამებრძოლ ტერორისტებზე. ვიდეოში, რომელიც რუსულ ვიდეო პორტალზეა ატვირთული, ტერორისტული დაჯგუფების ქართველი მებრძოლები ჰყვებიან როგორ ჩავიდნენ სირიაში და როგორ შეფიცეს ერთგულება ე.წ. ხალიფატის ლიდერ აბუ ბაქარ ალ-ბაღდათს. მათი განცხადებით, ისინი შარიათის კანონების გავრცელებისთვის იბრძვიან და იღუპებიან.

ერთ-ერთი მათგანი თანამებრძოლ აბუ მარიამზე, იგივე ხვიჩა გობაძეზე ჰყვება, რომ იგი მათი ამირი და მასწავლებელი იყო აჭარაში. ვიდეოში ჩანს საქართველოში გადაღებული კადრები, თუ როგორ ლოცულობს ხვიჩა გობაძესთან ერთად რამდენიმე მამაკაცი.

"ის იყო ჩვენი მასწავლებელი და ყოველთვის უნდოდა ალაჰის გზაზე ბრძოლა, რადგან როგორც მოჯაჰიდები ამბობენ, ისლამი არის ხე, რომელსაც თუ ჩვენ სისხლი არდ ავუსხით, გახმება", - ჰყვება ისლამური სახელმწიფოს ქართველი მებრძოლი.

ვიდეოში ერთ-ერთი ქართველი ჯიჰადისტი იხსენებს, თუ როგორ დაიჭრა სირიაში, შემდეგ როგორ გადავიდა თურქეთში სამკურნალოდ, საიდანაც საქართველოში გამოაძევეს, თუმცა, როგორც მონაყოლიდან ჩანს, ის საქართველოში თავისუფლად გადაადგილდებოდა და გარკვეული პერიოდის შემდეგ კვლავ დაბრუნდა სირიაში საბრძოლველად.

"ამ დროს აბდულ-ჰა ბა იყო პანკისში, ის მოვიდა ჩემთან და მკითხა, როგორ წასულიყო სირიაში. ამის შემდეგ ერთად მოვხვდით ბრძოლაში",-ჰყვება ISIS-ის ქართველი მებრძოლი.

ვიდეო ასახავს ISIS-ის ქართველი მებრძოლების სირიაში ყოფნის დამადასტურებელ ფოტო და ვიდეო კადრებს. ზოგიერთ ფოტოზე ტერორისტები ბავშვებთან ერთად არიან ასახულები. იგი ტერორისტული ორგანიზაციის მედიაცენტრ Furat-ის მიერაა მომზადებული.

2015 წლის დეკემბერში პენტაგონმა განცხადება გააკეთა, რომ ნოემბრის თვეში დაჯგუფება ე.წ. ისლამური სახელმწიფოს სამი ლიდერი მოკლეს. დასახელებულ ტერორისტებს შორის იყო აბუ მარიამი, იგივე ხვიშა გობაძე, რომელიც ტერორისტული ორგანიზაციის ფულის გამოძალვის ქსელს ხელმძღვანელობდა.