დაავადებათა კონტროლის ეროვნული ცენტრის ხელმძღვანელი, ამირან გამყრელიძე აცხადებს, რომ მეხუთე ტალღა იმ შემთხვევაში გადავადდება, თუ ოქტომბერ-ნოემბერში აცრების რაოდენობა გაიზრდება.

"ბევრი რამე დამოკიდებულია ისევ და ისევ ჩვენზე, როგორ შევხვდებით. თუ კუმულაციური იმუნიტეტი ანუ აცრების რაოდენობა მნიშვნელოვნად გაიზარდა ოქტომბერ-ნოემბერში, მაშინ ეს მეხუთე ტალღა კიდევ უფრო გადავადდება და იქნება შედარებით მსუბუქი. ასევე, დამოკიდებულია ამ მეხუთე ტალღის დაწყება, თუ როგორი იქნება, ზოგადად, რესპირაციული ვირუსების სეზონი — ანუ წელს გრიპი იქნება ისეთივე ნაკლებად აქტიური როგორც შარშან თუ უფრო აქტიური", — განაცხადა გამყრელიძემ რუსთავი 2-ის ეთერში.

26 სექტემბრის მონაცემებით, საქართველოში კორონავირუსის 1 132 ახალი შემთხვევა დადასტურდა, გამოჯანმრთელდა 2 956, ხოლო გარდაიცვალა — 30 ადამიანი.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფორმაციით, 26 სექტემბრის მონაცემებით სულ ჩატარებულია 1 742 547 აცრა. სრულად ვაქცინირებულია 772 240 ადამიანი — მოზრდილი მოსახლეობის 27,0%.