ქართული ოცნების თავმჯდომარის, ირაკლი კობახიძის თქმით, თეა წულუკიანის მხრიდან ჟურნალისტისთვის მიკროფონის წართმევა პოლიტიკური პერფორმანსია, ნიკა მელიას მხრიდან კი ძალადობის დემონსტრირება.

"მისი [თეა წულუკიანის] მხრიდან ეს იყო კონკრეტული პოლიტიკური მარტივი პერფორმანსი იმ კონკრეტულ დღეს, რაც შეეხება ნიკანორ მელიას, მან მედიის ერთ-ერთი ატრიბუტი, მიკროფონი გამოიყენა ძალადობის დემონსტრირებისთვის. მედია და ძალადობა, ეს კომბინაცია, მედიის მიმართ ძალადობა არის ნაცმოძრაობის და ნიკანორ მელიას ხელწერა. არც მედიაზე ძალადობა, არც ბიზნესზე ძალადობა და ა.შ. მათ აღარასდროს აღარ გაუვათ ამ ქვეყანაში, ისინი ვერასდროს დაიბრუნებენ იმის ბერკეტებს, რომ იძალადონ", — განაცხადა კობახიძემ.

გუშინ 23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

დაპირისპირების შემდეგ, ევროკავშირის წარმომადგენლობის ოფისთან მალევე ქართული ოცნების მხარდამჭერები შეიკრიბნენ. ისინი აცხადებდნენ, რომ ადგილზე დარჩებოდნენ ნიკა მელიას გამოსვლამდე. მოგვიანებით, ქართული ოცნების ოფისში პარტიის წარმომადგენლებმა ბრიფინგი გამართეს. მამუკა მდინარაძემ განაცხადა, რომ იქ შეკრებილებს ტერიტორიის დატოვება პირადად სთხოვეს. ენმ-ს წევრმა კი თქვა, რომ სანამ უსაფრთხოება უზრუნველყოფილი არ იქნება, მელია ევროკავშირის ოფისს არ დატოვებს.

მოგვიანებით ევროკავშირის ოფისთან შეკრებილი ქართული ოცნების მხარდამჭერები დაიშალნენ და ამის შემდეგ ნიკა მელიამაც დატოვა ოფისი.