აზერბაიჯანელი გამომძიებელი ჟურნალისტი ხადიჯა ისმაილოვა გათავისუფლებულია. ამის შესახებ ინფორმაციას რადიო თავისუფლება ავრცელებს. გარდა ამისა, მისი გათავისუფლების შესახებ ფეისბუკზე წერენ ისმაილოვას მეგობრები და თანამშრომლები.

BBC-ის აზერბაიჯანული სამსახურის ინფორმაციით, დღეს, 25 მაისს, ისმაილოვას საპატიმრო სასჯელი 5-წლიანი პირობითი სასჯელით შეუცვალა ბაქოს სააპელაციო სასამართლომ.

ისმაილოვას მეგობარმა და თანამშრომელმა, OCCRP-ის გამომძიებელმა ჟურნალისტმა მირანდა პატრუჩიშმა ფეისბუქზე რამდენიმე წუთის წინ დაწერა Khadija is Free (ხადიჯა თავისუფალია).

ხადიჯა ისმაილოვა აზერბაიჯანის ხელისუფლებამ 2014 წლის მიწურულს დააკავა და ბრალად დასდო თანამშრომლის თვითმკვლელობამდე მიყვანა, ასევე გადასახადებისგან თავის არიდება და არალეგალურ ბიზნეს საქმიანობაში ჩართვა. მას 2015 წელს 7,5 წლით პატიმრობა მიესაჯა.

ხადიჯა ისმაილოვა დაპატიმრებამდე მუშაობდა კორუფციის საკითხებზე. მან აზერბაიჯანის ხელისუფლება არაერთხელ ამხილა კორუფციასა და სხვა დანაშაულებებში.