საქართველოს პრემიერმინისტრი ირაკლი ღარიბაშვილი გამოქვეყნებულ ფარულ ჩანაწერებთან დაკავშირებით აცხადებს, რომ ფაქტს სახელმწიფო უსაფრთხოების სამსახური (სუს) "აღკვეთს". მისივე თქმით, უნდა დადგინდეს ვინ ახორციელებდა ფარულ მიყურადებას, რადგან მოსმენის საშუალება ძალიან ბევრ ადამიანსა და ქვეყანას აქვს.

"ჯერ ერთი, ეს უნდა დადგინდეს, დამტკიცდეს, ვინ უსმენდა, როგორ უსმენდა, უსმენდა თუ არა, ძალიან ბევრ ადამიანს აქვს ამის მოსმენის საშუალება და ძალიან ბევრ ქვეყანას. სუს, რა თქმა უნდა, აღკვეთს. გამოძიებაც დაწყებულია და ყველაფერი გაირკვევა", — განაცხადა ღარიბაშვილმა.

კითხვაზე აზიანებს თუ არა ქვეყანას ის, რომ ფარულ ჩანაწერებში სხვა ადამიანებთან ერთად, ელჩებიც ფიგურირებენ, ღარიბაშვილი პასუხობს, რომ ქვეყანას არა აღნიშნული, არამედ "მთელი ეს აჟიოტაჟი აზიანებს".

"ქვეყანას აზიანებს, რა თქმა უნდა, მთელი ეს აჟოტაჟი, რომელიც მხოლოდ და მხოლოდ პოლიტიკური მიზნით, არჩევნებისთვის არის შექმნილი. რა თქმა უნდა, აზიანებს და აბსოლუტურად გეთანხმებით, რომ აზიანებს მთელი ეს ქაოსი და ალიაქოთი, რაც არის", — თქვა ღარიბაშვილმა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: