დღეს ვაქცინაციის წამახალისებელი პირველი ლატარია გათამაშდა. ყოველდღიურ ლატარიაში 100 და 500 ლარი გათამაშდა და გამოვლინდა 160 გამარჯვებული.

ერთ-ერთი გამარჯვებული ცნობილი ბლოგერი და პედაგოგი ლამარა აბჟანდაძეა, ამის შესახებ მან ფეისბუქზე დაწერა:

"ამ დილით ჩემმა შვილიშვილმა პირადობის ნომერი მომთხოვა. გამიკვირდა, რისთვის დასჭირდა? მაგრამ იმწამსვე მომახარა ბებო 100 ლარი მოიგეო. ეს ლატარია აცრილებზე ყოფილა. მე რა თქმა უნდა ერთ-ერთმა პირველმა ავიცერი და რადგან პირადობაში ქმრის გვარზე ვარ ხიდაშელზე, გათამაშებაში ეწერა ლ. ხ. ეს მე ვარ ლამარა აბჟანდაძე..
ყველას გირჩევთ, აიცრათ. ხოლო ვინც აცრილები ხათ, შეამოწმოთ საიტზე მოიგეთ თუ არა".

90 წლის ბლოგერი ასტრაზენეკას ვაქცინით 2021 წლის აპრილში აიცრა. ის აქტიურად მოუწოდებს საზოგადოებას კორონავირუსის საწინააღმდეგო ვაქცინა გაიკეთონ.

"უკვე 91 წლის ვხვდები. ჩემი სიცოცხლის ხანგრძლივობა შედეგია იმ სწორი ცხოვრებისა, რომელსაც მე ვეწეოდი დღემდე და ვეწევი ახლაც, მე ორჯერ გადავრჩი აცრით. ერთხელ ბავშვობაში ყვავილის აცრით და მეორედ ახლა, როცა ასტრაზენიკით ერთ–ერთმა პირველმა ავიცერი", — წერდა ის აგვისტოში.

ლატარიის გათამაშებები ვებგვერდზე www.stopcov.lotto.ge ყოველდღე 12 საათზე იმართება. აცრილმა მოქალაქეებმა იმის გასაგებად მოიგეს თუ არა, მითითებულ ველში უნდა ჩაწერონ პირადი ნომერი.

ლატარიის საპრიზო ფონდი შეადგენს 2 800 000 ლარს და გათამაშდება ყოველდღიურ რეჟიმში წლის ბოლომდე. ყოველდღიური გათამაშების გარდა იქნება ყოველკვირეული შემაჯამებელი გათამაშებაც. ყოველდღიურად გათამაშდება 100 და 500 ლარი, ყოველკვირეულად 1 000, 1 500, 5 000 და 10 000 ლარი, ხოლო შემაჯამებელი გათამაშება წლის ბოლოს გაიმართება და საპრიზო ფონდი 100 000 ლარი იქნება.

ლატარიაში მონაწილეობას იღებენ, როგორც სრულად აცრილები, ისე ერთი დოზით აცრილი მოქალაქეები. კომპანია გამარჯვებულებს შემთხვევით შერჩევითობის პრინციპით გამოავლენს.

თუ წამახალისებელ გათამაშებაში ვერ მოიგეთ, გული არ დაგწყდეთ, რადგან ვაქცინაციის შემთხვევაში თქვენ უკვე გამარჯვებული ხართ. აცრის შემდეგ ინფიცირების შემთხვევაში მომაკვდინებელი ვირუსს უფრო მარტივად დაამარცხებთ, თქვენი გადარჩენის შანსი კი 99%-ზე მაღალია.

გაიგეთ მეტი: