საქართველოს პრემიერმინისტრმა, ირაკლი ღარიბაშვილმა განაცხადა, რომ მთავარი საქმე და მიზანი სიღარიბის დაძლევა უნდა იყოს და არა "უაზრო დებატები და პოლიტიკური ბატალიები". ამის შესახებ მან ნინოწმინდის მერობის კანდიდატის წარდგენისას ისაუბრა.

"ჩვენ ეტაპობრივად, თანდათანობით ყოველწლიურად მივუახლოვდებით იმ დიდ მიზანს, როცა ქვეყანაში იქნება დაძლეული სიღარიბე და უმუშევრობა. აი, ეს უნდა იყოს ჩვენი მთავარი მიზანი და მთავარი საქმე და არა უაზრო დაპირისპირება ერთმანეთში პოლიტიკოსებს შორის, უაზრო დებატები და პოლიტიკური ბატალიები, ჩვენ აღარ გვჭირდება, ხალხი დაიღალა ამდენი პოლიტიკური შოუების და უსაგნო, უსაფუძვლო საუბრებით", — განაცხადა ღარიბაშვილმა.

2 სექტემბერს პარტია საქართველოსთვის ლიდერმა, გიორგი გახარიამ თბილისის მერობის კანდიდატები, ნიკა მელია და კახა კალაძე დებატებში გამოიწვია. გარდა ამისა, ფორმულამ, TV პირველმა, მთავარმა არხმა და კავკასიამ დედაქალაქის მერობის სამი ყველაზე რეიტინგული კანდიდატი — კახა კალაძე, ნიკა მელია და გიორგი გახარია საერთო ეთერში სადებატოდ მიიწვიეს. მიუხედავად იმისა, რომ კალაძემ გახარიას დებატებში გამოწვევაზე განაცხადა, რომ მზადაა მერობის ნებისმიერ კანდიდატთან იდებატოს, 4 ტელევიზიის მოწვევას უარით უპასუხა და თქვა, რომ დებატებისთვის მხოლოდ საზოგადოებრივ მაუწყებელზე მივა.