გოგი თოფაძის განცხადებებზე, რომლებშიც მან თავდაცვის მინისტრი თინა ხიდაშელი საგარეჯოში ჩატარებული თვითმმართველობის არჩევნების გაყალბებაში დაადანაშაულა, გამოძიება სისხლის სამართლის კოდექსის 332-ე მუხლის პირველი ნაწილის მიხედვით დაიწყო. ამის შესახებ on.ge-ს პროკურატურაში განუცხადეს.

აღნიშნული მუხლის პირველი ნაწილი მოხელის, ან მასთან გათანაბრებული პირის მიერ სამსახურებრივი უფლებამოსილების საჯარო ინტერესის წინააღმდეგ ბოროტად გამოყენებას გულისხმობს და ისჯება ჯარიმით ან თავისუფლების აღკვეთით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

თავდაცვის მინისტრი თინა ხიდაშელი პროკურატურას ფაქტის ოპერატიულად და ხარისხიანად გამოძიებისკენ მოუწოდებს. მისი თქმით, საჭიროა ყველა დასმულ შეკითხვას სათანადო პასუხი გაეცეს:

"არავითარი ილუზია არ მაქვს, რომ მათ სინამდვილეში სიმართლე აინტერესებთ, მაგრამ ამასობაში ჩვენ, ქვეყანა ვართ დაინტერესებული იმაში, რომ ეს ბინძური კამპანია, ყოველ შემთხვევაში იმ მასშტაბით და იმ ფორმით, რაც ხელისუფლებას მოეთხოვება დასრულდეს".

2015 წლის ოქტომბერში საგარეჯოში გამართულ რიგგარეშე არჩევნებში კოალიცია ქართული ოცნების კანდიდატმა რესპუბლიკური პარტიიდან თამარ ხიდაშელმა პატრიოტთა ალიანსის კანდიდატ ირმა ინაშვილს არჩევნები რამდენიმე ასეული ხმით მოუგო.

2016 წლის 10 თებერვალს ფრაქცია ქართული ოცნება-მრეწველების თავჯდომარე გოგი თოფაძემ საქართველოს თავდაცვის მინისტრი თინა ხიდაშელი სოწორედ ამ არჩვენების გაყალბებაში დაადანაშაულა. ამ მოსაზრებას იზიარებს პატრიოტთა ალიანსის ხელმძღვანელი ირმა ინაშვილიც, რომელმაც არჩევნების გაყალბებაზე საუბარი შედეგების გამოცხადებისთანავე დაიწყო.

25 თებერვალს TI-მ გაავრცელა განცხადება, რომელშიც პროკურატურას ამ საქმის გამოძიებისკენ მოუწოდა.