ერთიანი ნაციონალური მოძრაობის თავმჯდომარის, ნიკა მელიას თქმით ქვეყნისთვის მნიშვნელოვან მოვლენებში ფიზიკურად ჩართვის უფლება საქართველოს ნებისმიერი მოქალაქეს აქვს. ასე გამოეხმაურა ის ექსპრეზიდენტ, მიხეილ სააკაშვილის სამშობლოში შესაძლო დაბრუნებას.

"მგონია, რომ იმ მნიშვნელოვან ეტაპზე, სადაც ჩვენ ვიმყოფებით, გზაგასაყარზე — ევროპასა და პუტინის რუსეთის ფედერაციის გზაგასაყარს ვგულისხმობ — საქართველოს ყველა მოქალაქეს აქვს, ბუნებრივია, სურვილი და უფლება, მით უმეტეს, იყოს ამ მოვლენებში აქტიურად ჩართული, მათ შორის, ფიზიკურად.

რა გასაკვირია, რომ მიხეილ სააკაშვილს ამის სურვილი აქვს, გაუჩნდა და გეგმავს საქართველოში ჩამოსვლას, ხო? მე მის ადგილზე უკვე საქართველოში ვიქნებოდი", — განაცხადა ნიკა მელიამ მთავარი არხის ეთერში.

ენმ-ს ლიდერის თქმით, მნიშვნელოვანია, ეს პროცესი სრულიად მშვიდობიანად წარიმართოს. იგი აცხადებს, რომ სააკაშვილის დაბრუნებაში ქართველ ხალხთან ერთად უდიდესი როლი საერთაშორისო საზოგადოებას უჭირავს და მათი მხარდაჭერა აუცილებელია. მელია აღნიშნავს იმასაც, რომ ამის შესახებ მიხეილ სააკაშვილს კიევში ყოფნისას დეტალურად ესაუბრა.

"ერთი რამ ზუსტად ვიცი, ეს უნდა იყოს უკიდურესად მშვიდობიანი აქტი. მორალური უპირატესობა, რომელიც დღეს აქვს ოპოზიციასა და საზოგადოებას კიდევ უფრო უნდა განვამტკიცოთ. არ მივცეთ შესაძლებლობა ხელისუფლებას, რეჟიმს, რაიმე სახით შეცდომაში შეიყვანოს საერთაშორისო საზოგადოება", — განაცხადა ენმ-ს თავმჯდომარემ.

6 სექტემბერს სააკაშვილმა საკუთარი გეგმების შესახებ ისაუბრა და კვლავ თქვა, რომ საქართველოში ჩამოვა. ის თარიღს ისევ არ აკონკრეტებს, თუმცა აცხადებს, რომ ამასთან დაკავშირებით მოსახლეობას საქმის კურსში მაშინ ჩააყენებს, როცა ყველაფერი ხელთ ექნება.

ეს პირველი შემთხვევა არ არის, როდესაც სააკაშვილი საქართველოში დაბრუნებაზე საუბრობს. იმავეს ამბობდა ის წინა არჩევნების პერიოდშიც და ეს რამდენჯერმე დააანონსა ახლაც, თვითმმართველობის არჩევნებამდე.

მმართველ პარტიაში აცხადებენ, რომ ყოფილ პრეზიდენტს ქვეყანაში შემოსვლისთანავე დააკავებენ. მიხეილ სააკაშვილის მიმართ საქართველოში არაერთი გამამტყუნებელი განაჩენი არსებობს და მასზე ქართველ სამართალდამცავებს ძებნა აქვთ გამოცხადებული.