BBC-ის ცნობით, გაერთიანებული სამეფოს ხელისუფლება შოტლანდიის დამოუკიდებლობაზე რეფერენდუმის ჩატარებისთვის ნებართვას არ გასცემს. "ახლა ამის დრო არ არის," - განაცხადა პრემიერ-მინისტრმა ტერეზა მეიმ. მისივე თქმით, ქვეყანამ უნდა იმუშაოს ერთად და არ უნდა დაშორდეს ერთმანეთს.

"ვფიქრობ, უნდა ვიმუშაოთ საუკეთესო შეთანხმების მიღებაზე შოტლანდიისა და გაერთიანებული სამეფოსთვის და ასევე, სამომავლო ურთიერთობაზე ევროკავშირთან. უსამართლო იქნებოდა შოტლანდიის მოქალაქეებისთვის, რომ მოვთხოვოთ არჩევანის გაკეთება ამისთვის აუცილებელი ინფორმაციის გარეშე."

შოტლანდიის კონსერვატორმა ლიდერმა რუთ დევიდსონმა განაცხადა, რომ შოტლანდიის პირველი მინისტრის, ნიკოლა სტერჯენის მიმართვა რეფერენდუმის ჩატარებასთან დაკავშირებით საბოლოოდ უარყოფილი იქნება.

თავად სტერჯენმა კი BBC-ის უთხრა, რომ რეფერენდუმის დაბლოკვა "დემოკრატიის პრინციპების დარღვევა" იქნება:

"ეს არის დამოუკიდებლობის არგუმენტი ორ სიტყვაში, ის, რომ უესტმინსტერი ფიქრობს, რომ აქვს უფლება დაბლოკოს შოტლანდიის ხელისუფლების დემოკრატიულად არჩეული მანდატი და შოტლანდიის პარლამენტის უმრავლესობა."

სტერჯენი ითხოვს, რომ რეფერენდუმი 2018 წლის შემოდგომისა და 2019 წლის გაზაფხულის შორის პერიოდში ჩატარდეს, გაერთიანებულ სამეფოსა და ევროკავშირს შორის ბრექსიტის მოლაპარაკებების დასრულების შემდეგ.

2014 წლის სექტემბერში გამართულ რეფერენდუმში შოტლანდიის მოქალაქეების 55-მა პროცენტმა გაერთიანებულ სამეფოში დარჩენას დაუჭირა მხარი. სტერჯენი ამბობს, რომ მეორე გამოკითხვა აუცილებელია, რომ ქვეყანამ გადაწყვიტოს რა მიმართულებით წავა ბრექსიტის რეფერენდუმის შემდეგ.