"სიმულაცია და პარალელური თბილისი", — ამ ფორმით აფასებს კალაძის პრეზენტაციას ლელოს მერობის კანდიდატი ანა ბიბილაშვილი.

მისი თქმით, კალაძემ პრეზენტაციით ამ ქალაქის მოსახლეობას კიდევ ერთხელ აჩვენა, რომ მას არ გააჩნია თბილისის განვითარების ერთიანი ხედვა. მის პროგრამაში არსად ჩანდა ნამდვილი თბილისი და არც თბილისში მცხოვრები ადამიანები.

"კალაძის პრეზენტაცია არის სიმულირებული რეალობა, რომელსაც მე კალაძის პარალელურ თბილისს ვუწოდებ. პარალელურ თბილისში, კალაძემ ახალი გენერალური გეგმა მიიღო, რომელიც იცავს ქალაქს. ნამდვილ თბილისში, გენერალური გეგმის დამუშავება კალაძემდე იყო დაწყებული, მან გენ. გეგმა მხოლოდ გამოშიგნა. სად არის რკინიგზის გადატანის კონცეფცია? ამოღებულია! სად არის ელიავას განვითარების კონცეფცია? ამოღებულია! სად არის ქალაქის მომავლის ერთიანი ხედვა? ესეც გამქრალია გენერალური გეგმიდან", — აღნიშნა ბიბილაშვილმა და იმ რიგ პრობლემებზე გაამახვილა ყურადღება, რომლის წინაშეც დღეს თბილისი დგას.

"კალაძის პარალელურ თბილისში, თურმე აღარ არის ქაოტური განაშენიანება. სამაგიეროდ, ჩვენს თბილისურ რეალობაში, ქალაქის იერსახე ყოველდღე იძირება ურბანულ ქაოსში. კალაძის პარალელურ თბილისში, გარემოს დაცვა ხელოვნური ბუჩქები და ბეტონის პარკებია. თბილისის რეალობაში არსებობს კალაძის ხელშეწყობით განადგურებული დიღმის ჭალები. თბილისურ რეალობაში, ქალაქს სასიცოცხლოდ სჭირდება მეტი ნამდვილი და ბუნებრივი მწვანე სივრცე. კალაძის პარალელურ თბილისში, ქალაქი თურმე უსაფრთხოა, მაშინ როდესაც თბილისის რეალობაში სულ რამდენიმე თვის წინ ვაშლიჯვრის მეწყერი დაიძრა და ადამიანების სიცოცხლეს შეუქმნა საფრთხე. სულ რამდენიმე კვირის წინ, საკუთარ სახლში მცხოვრებ ადამიანებს ლორთქიფანიძის ქუჩაზე გამოუთხარეს საძირკველი. ადამიანებს რეალურად სჭირდებათ უსაფრთხოების განცდა და დაცულობა. კალაძის პარალელურ თბილისში, სატრანსპორტო მწვანე პოლიტიკა არის მწვანე ავტობუსი და საცობების პრობლემას აწესრიგებს ავტობუსების და მარშრუტკების ფერის შეცვლა", — აცხადებს ბიბილაშვილი.

ბიბილაშვილმა პრობლემის მოგვარების გზაზეც ისაუბრა და აღნიშნა, რომ ხვალ ლელოს გუნდი წარადგენს თბილისის განვითარების ერთიან ხედვას — თბილისის მარშალის გეგმას, სადაც რეალური თბილისის რეალური განვითარების კონცეფცია იქნება წარმოდგენილი.